Page 15 - HOH
P. 15
El a conta cu mas of menos tres siman pasa tabata tin e atake cibernetico manera ta
conoci. Na e momentonan ey e grupo cu a comete e atake a pidi un recompensa di 25
Bitcoin. E dia ey e Bitcoinnan tabata na balor di 10 mil dollar cada un, cu ta yega na un
total di 250 mil dollar.
Ta papiando aki di 250 mil dollar cu a wordo pidi pa release e informacion cu a wordo
encrypted. Na e momentonan ey caba, e Rampenteam cu gobierno tin institui a yama tur
departamento envolvi y e opperbevelhebber tabata e prome minister, unda cu a tene un
reunion di caracter di urgencia pa atende cu e situacion cu a surgi.
Segun Minister Dangui Oduber, despues di un siman y mey, Gobierno a escala e
situacion pa evita cu e crisis por bira un calamidad. Na e momentonan ey Gobierno a
cuminsa en busca di un crisis manager, cu nan a apunta pa yuda den e situacion cu a surgi
na hospital.
Ta un situacion cu a trece varios reto adicional fuera di e situacion cu tin bao di
circunstancianan normal caba na hospital. E situacion di e ransomware, e hacker aki a
trece mas complicacion y p’esey Gobierno a haya necesario pa escala e situacion pa
busca un crisis manager.
Gobierno a apunta den e caso aki sr. Ronny van Trigt kende ta funcionando como crisis
manager na hospital. E termino cu sr. van Trigt a wordo apunta te na e momentonan aki
ta te un luna, cu e posibilidad pa extende te cu un pa dos luna mas.
Ta depende riba e raportahe cu e ta duna Gobierno riba e situacion, si ta wordo considera
cu ta necesario pa prolonga esaki, si of no.
