Page 39 - HOSPITAAL 12 JUNE 2017

Alex Schwengle: Por uza codigo di “Good governance” den
tur sector

Sunday, 11 June 2017 20:54
Comparti

Pa mas di 1 aña ta trahando riba e concepto pa introduci "Good Governance" no solamente den deporte
pero tambe den salubridad. Minister di Salud Publico, Cuido di Nos Grandinan y Deporte, dr. Carlos
“Alex” Schwengle
a sinti bon cu durante e debate politico di siman pasa, esaki tabata un topico cu diferente partido a trece
dilanti. Ya caba tin e ehempel nan y "good governance" no ta un ley pero e ta abstracto.
Simplemente e ta un grupo cu ta bini hunto y nan tin un solo meta y tin cosnan comun. E grupo aki di
sector di cuido, cu ta forma door di Minister di Salud Publico, AZV, Hospital, IMSan, SABA, Fundacion
Cas Marie, Club Kibrahacha y Wit Gele Kruis. Nan tur ta zorg pe cuido pa comunidad di Aruba y nan kier
haci algun palabracion riba kico ta e codigo di conducta, kico ta e acuerdonan basico cu nan lo traha cu
otro y con lo haci cu esaki lo ta transparente. Tambe pa mira con lo tene otro responsabel den e
acuerdonan y tur esey ta cosnan cu e grupo a discuti pa mas cu 1 aña.
Minister Schwengle ta contento cu el a ricibi yudansa di Profesor Harry Kunneman, kende ta un experto
den e area aki. Desde cu nan a cuminsa riba esaki mas di 1 aña pasa, Profesor Kunneman a ofrece
diferente seminario. Durante e seminarionan a splica over e topico gobernacion y kico e codigonan ta
encera, tambe a splica cu e codigonan mester ta di nan mes, di e grupo propio y di pais.
"No por copia esaki y uz'e asina sin mas, mester adapt'e na bo situacion local", asina Minister Schwengle
a expresa. E grupo tabata hopi habri pe discusion di "good governance" y ta mira e balor di esaki. E balor
lo ta garantisa cu tempo ora di haci uzo di e codigonan aki lo tin un bon gobernacion.
E grupo a mustra cu nan lo cumpli cu e palabracionnan aki, esaki ta muestra di transparencia. Pero si
mester desvia di e palabracionnan, tambe ta duna un transparencia y splica dicon a desvia di cierto
palabracionnan. Esaki ta cosnan esencial y ta cosnan cu awendia ta mustra cu no por tin un bon
gobernacion sin palabracionnan.

"Palabracionnan mester ta hopi cla y ami no ta kere den solamente bin cu un ley di bon gobernacion y cu
automaticamente e lo funciona bon. Nos mester mira e otro paisnan cu tin esaki den nan ley y no ta
cumpli cu nan", Minister Schwengle a indica. No mester solamente haci palabracionnan di kico e
reglanan mester ta den gobernacion, pero mester percura cu ta cumpli cu e palabracionnan. Ta papia
riba e codigonan y mester biba e codigonan y si tin desviacion mester duna cuenta con ta desaroy'e. E
grupo ta di acuerdo cu esaki y a firma un convenio di aceptacion di e codigonan. Tin un documento traha
y Minister Schwengle lo entreg'e na Parlamento y Conseho di Minister. No a planea e iniciativa aki pero a
bin cun'e pa motibo di necesidad. Den region esaki ta un adelanto grandi y por uza e codigo di "good
governance" den otro sector di gobernacion.