Page 23 - HOH

Arends: Mechanismo pa controla receta,

ta funciona bon

Posted on 06/22/2017 5:47 pm AST | Updated on 06/22/2017 8:42 pm AST

ORANJESTAD - E mechanismo pa controla recetanan na boticanan ta
funcionando. Directie VolksGezondheid (DVG) mester tene miho control
riba asunto di receta di medicina. Y ora di papia di control, ta papia di
posibel spot checks. Asina boticario Sharon Arends-Bareño a bisa
NoticiaCla relaciona cu e caso di investigacion di inspectie riba casonan
fraudulento di receta cu ta tumando lugar aworaki. Arends no ta kere cu
e problema ta cerca e boticarionan sino e control di e inspectie y e
docternan cu ta prescribi e recetanan.

PROCESO

Segun Arends, e proceso di receta ta cu tur boticario ora cu un pashent yega
na un botica cu un receta, tin un lista di e docternan inscribi cu ta autorisa pa
traha na Aruba como medico. Esaki ta via DVG. "Tur e docternan tin un code.
Y bo tin diferente docter. Pero no tur docter ta contractant di AZV" Arends ta
sigui bisa. E ta referi na e asina yama 'cash docters' cu si ta inscribi na DVG.
E boticarionan ta controla entre otro si e pashent ta inscribi na e botica
respectivo, si e receta ta scibi pa un docter autorisa na Aruba (tin hopi
pashent cu ta bin cu receta di docternan di afo tambe), y e ora e receta por
wordo emiti. "Si tin casonan cu docternan cu no ta ingeschreven na DVG, nos
no por acepta nan legalmente.

E MECHANISMO DI CONTROL TA FUNCIONA?

Recientemente e mandatario encarga cu salud Alex Schwengle a sugeri cu
por ta (investigacion andando tin cu determina esey si) e mechanismo pa
evita fayo den acepta receta falso, no ta funcionando. Pero Arends a sigura e
portal aki cu e mechanismo ta funciona. "E ta funciona. DVG ta schrijf in un
arts. Awor si bo ta puntra'mi cu si tin arts cu porta ta laga hendenan traha
ilegal pa nan, na nan consultorio y ta uza nan recetanan y e artsnan ta firma
nan, esey ta hopi dificil pa nos sa si esey ta e caso" Arends a sigui bisa.
Dificil, pasobra segun e boticaria, e cantidad di docter na Aruba a aumenta
asina hopi ultimo añanan compara cu antes. "Antes Aruba tabata chikito cu bo
tabata sa precies tur handtekening di cua docter tabatin" e la sigui bisa. "Bo
no conoce tur handschrift. Bo tin cu bay na e code cu bo ta haya di DVG"