Page 45 - ATA

Aruba tabata tin un prome kwartaal sumamente positivo, tin preocupacionnan
cu esaki no lo continua pa henter e aña.

Tur hende, es decir minister y sindicatonan ta papiando di boutique hotel na
Savaneta y San Nicolas y basicamente, segun Sr. Hepple, un di e motibonan di
esaki ta cu esakinan tin menos impacto ariba nos medio ambiente. Un hotel di
50 camber tin menos impacto cu un hotel di 500 camber. Un di e retonan cu
Aruba tin su dilanti ta cu ta birando sumamente dificil pa haya trahadonan
cualifica. Un hotel chikito ta rekeri menos personal, y e ta mas factibel cu un
hotel mas grandi, cu ta rekeri un cantidad di personal hopi mas grandi. Esaki ta
uno y e otro ta cu Aruba tin poco beach cu a resta, y cualkier hotel cu bin lo ta
leu di e beachnan. Un hotel boutique tin mas sentido y esaki tin su atractivo
cun’e. Pero toch, un decision mester wordo tuma, pa e bienestar di e sector
turistico, cu ainda ta e pilar economico mas grandi di Aruba, y e economia di
Aruba pa un 80 pa 90% ta depende di turismo.

Si e pais kier sigui crece, y kier sigui e estilo di bida cu nos ta custuma cun’e,
esey kiermen cu e industria turistico mester sigui competi y ta exitoso. Te na
unda e boutique hotel por contribui na e crecemento economico, ta un reto
sigur. Esaki door cu nan ta mas chikito, e impacto economico ta bay ta menos.
Pero sigur e ta un direccion cu tin su merito cun’e, cu AHATA ta apoya.

Pa loke ta e prijs, esaki sigur lo tin su efecto cun’e, pero cualkier oferta cu e
boutique hotel por duna na e cliente, ta atrae un otro tipo di cliente, segun Sr.
Jim Hepple, di AHATA.