Page 7 - AWEMAINTA

Diahuebs, 28 Juni 2018 AWEMainta 7

Si paga number despues di 2 juli ta haya

cobransa adicional incluyendo boet

DEPARTAMENTO di Impuesto ta recorda tur doño di vehiculo
di motor cu dia 2 di juli proximo ta ultimo dia pa paga e impuesto
di vehiculo di motor di e di dos mita di aña 2018. Entrante 3 di
juli 2018 tur automobilista cu ta uzando e careteranan publico
mester tin e belasting di aña 2018 completamente paga. Esaki ta
nifica tambe cu tur vehiculo mester tin e sticker roos pega riba e
windshield.
Departamento di Impuesto ta conseha su clientenan pa haci e
pago di belasting na tempo y no warda te na ultimo, mirando cu
ta premira cu den e siguiente dianan lo bay bira druk.
Por haci e pago na oficina sea na Camacuri of den districto. Ta
recomendabel pa haci e pago di impuesto di vehiculo di motor via
‘Online Banking’ pa mas comfortabilidad. E sistemanan digital di
e banconan ta facil y sigur. Despues di 5 dia di trabou por pasa
busca e sticker na nos oficina na Camacuri.
Departamento di Impuesto lo cuminsa prepara pa saca e
cobransanan adicional di impuesto di vehiculo di motor di aña
2018 pa esnan cu no a cumpli cu e pago stipula den ley.
Si un cliente no haci e pago of haci e pago despues di dia 2 di juli,
e lo por bay haya un cobransa adicional inclui boet. E cobransa
adicional lo bay costa e cliente mucho mas di loke e lo mester a
paga na belasting.
P’esey ta recomendabel pa no pospone e pago, no laga e debe
keda acumula, pa asina evita di paga di mas.