Page 113 - MIN VOS 7 OCT 2015

IBiSA ta informa: Dia 10 di october ta “Dia Mundial di Salud
Mental”
Wednesday, 07 October 2015 09:31

Comparti

E organisacion mundial di salud “World Health Organisation” (WHO) ta conmemora e ‘Dia Mundial di
Salud Mental” diasabra awor, dia 10 di October 2015. E dia aki a wordo celebra pa prome biaha na aña
1992 door di iniciativa di e ‘Federacion Mundial di Salud Mental’, cu ta un organisacion cu tin miembro y
contactonan den mas di 150 pais.

Dia Mundial di Salud Mental’ ta un dia riba cual ta enfoca riba educacion di salud mental y riba defensa
di esnan vulnerabel sufriendo di salud mental. Riba e dia aki e organisacionnan mundial ta bini hunto pa
trata e programanan di conscientisacion riba enfermedad mental y e efecto grandi cu e enfermedad aki tin
riba bida di e ser humano rond mundo.

Miles di persona rond mundo cu tin problema di salud mental ta wordo priva di nan derechonan humano.
No solamente nan ta wordo discrimina, stigmatisa y marginalisa pero tambe nan ta obheto di abuso
emocional y fisico den comunidad y hasta den e centronan di rehabilitacion mental. Den hopi pais e falta
di calidad di cuido debido, como tambe e falta di personal profesional ta e causa di tur esaki.

E tema di e ‘Dia Mundial di Salud Mental’ e aña aki ta “Dignidad den Salud Mental”.

E aña aki e organisacion mundial di salud, WHO lo hiba un campaña di conscientisacion riba locual por
wordo haci pa garantisa cu e persona cu tin problema di salud mental por sigui biba cu dignidad atrabes
di reglanan y ley di ‘Derechonan Humano’, como tambe capacitacion di profesionalnan di salud; e respet
y informacion cu un tratamento asina ta rekeri y e proceso di tuma desicionnan y campaña di informacion
na publico.

E articulo ta tuma for di e website di WHO, seccion ‘World Mental Health Day 2015’ y IBiSA ta comparti e
informacion cu comunidad, conmemorando asina e dia oficialmente cu ta dia 10 di october.