Page 53 - KPA

Giovanni Capriles tabata un di e Conseheronan di Minister Paul Croes, encarga cu su

Relacionnan Publico y alabes ta Presidente di e Fundacion di campaña di e mandatario.

Husticia ta acus’e di labamento di placa y complicidad di soborno.

Mester bisa cu Husticia ta investigando specificamente tambe e fundacion di campaña di

e Minister, esta Stichting Leadership and Excellence. Desde 18 di december 2014,

Giovanni Capriles ta encabesa e fundacion.

Manera ta conoci, dia 28 di maart ultimo, Husticia a bishita un total di 13 diferente adres,

incluyendo Bestuurskantoor, relaciona cu un investigacion cu a haya e nomber di Ibis. A

detene algun hende den e caso aki, den cual Ministerio Publico ta acusa e mandatario

personalmente di a tuma regalonan, promesanan y/of servicionan relaciona cu

“ontheffing” di e “arbeidsmarkttoets” dor di cual stranheronan a haya oportunidad pa

haya permiso di trabou.

Concretamente e acusacion contra Minister Paul Croes ta: “Ambtsmisbruik” y duna

permisonan cu no tabata mag di traha na Aruba a base di nan “verblijfstitel”, oportunidad

pa toch traha na Aruba.

Tambe ta acus’e di labamento di placa di sobornonan ricibi. E sospecho di “ambtelijke

corruptie” ta consisti di pidi/tuma soborno a cambio di “ontheffing van het

arbeidsmarkttoets”. Despues di e “huiszoeking” na su cas, a acus’e tambe di

“mensensmokkel” argumentando cu e tabatin un empleada illegal trahando den su cas.

Den e proceso a investiga y detene varios sospechoso y a interoga decenas di personanan

di interes. Mayoria di e sospechosonan a recobra nan libertad mientras cu Minister Paul

Croes y su chauffeur Roque Aparicio ta permanence encarcela, cu un cantidad di

limitacion pa evita cu nan tin contacto cu otro presonan den KIA, famia of otro

personanan di interes den e investigacion.