Page 8 - HOH
P. 8
6 AWEMainta Diahuebs, 10 October 2019
Cu enfoke pa mantene continuidad riba tereno di cuido y baha gasto
Hospital cu su propio Recruitment Center
pa atrae mas profesional capacita
Dr. Horacio E. Oduber Hospital recientemente a
celebra hunto cu partnernan y Departamento di
Human Resources (HR) e apertura di Recruitment
Center. Esaki ta un departamento cu ta resorta bou
departamento di HR di Hospital cu a habri su portanan
oficialmente riba 1 di october.
A habri e mainta aki cu un discurso di Manager HR,
esta sr. Sheila Kelly sigui p’e momento oficial cu a
corta cinta den compania di sr. Ezzard Cilié di Hunta
di Directiva hunto cu e team di Recruitment Center.
P’añas Hospital tabata depende mayoria di bes di
companianan externo cu tin experticio riba e Mercado
Laboral internacional. Nan tabata intercede pa
Hospital p’asina yega na personal capacita cu no tin na
Aruba manera algun specialismo nan, enfermeronan
specialisa etc. For di dia 1 di october oficialmente ta
cambia e rumbo y ta yama bon bini na Recruitment
Center di Hospital. Cu e departamento aki Hospital
mes lo logra amplia netwerk riba mercado laboral y
asina mantene e continuidad den brinda cuido riba
nivel y rebaha gastonan cu antes mester a ser paga na
e diferente compania nan externo.
E Departamento di Recruitment Center ta consisti di
un Recruitmentadviseur cu alabes t’e persona cu ta
coordina e departamento nobo aki, esta sra. Mayren
Heeringa. Tambe lo tin un Recruiter y miembro di
personal administrativo pa sostene e departamento aki.
Temporalmente e departamento aki ta wordo asisti pa
sr. Jonathan Croes, kende ta un experto riba tereno di
recruitment, specialmente pa loke t’e sector di cuido.
Por ultimo, pero sigur no menos importante, Hospital
su Recruitment Center ta spera di por sigui conta y
alabes traha mas intenso y cu cooperacion mutuo den e
futuro cercano cu tur instancia gubernamental p’asina
logra meta di mantene continuidad den cuido medico.
Hunto nos lo por logra yega na personal capacita cu
lo bay duna aporta na sigui eleva calidad di cuido di
nos Hospital. Pabien cu un logro pa Hospital y Cuido
Medico en general!
