Page 36 - MIN VOS 29 MAY 2017

Hefe di Mision Kamilah Dammers a atende e Seminario II
Juegos Suramericanos de la Juventud na Santiago de Chile

Monday, 29 May 2017 07:08
Comparti

Recientemente Kamilah Dammers a keda nombra pa Comite Olimpico Arubano como e Hefe di Mision
pa e di dos edicion di e Weganan Suramericano Hubenil 2017 cu e anja aki lo tuma lugar entre dianan 29
di september y 8 di oktober na e ciudad di Santiago de Chile, Chile. E Weganan aki ta habri pa atletanan
hubenil entre 14 y 17 aña di edad.

Ya caba Kamilah Dammers a atende e seminario organisa pa e comite organisador unda tur e hefenan di
mision di e paisnan participante tabata presente. Durante di e seminario a elabora riba diferente topico
manera e organisacion, e deportenan, e acomodacionnan deportivo, yegada/salida, logistica, hotelnan
oficial, alimentacion, transporte, seguridad y tur e servicionan cu nan lo brinda nos atletanan. Mester
bisa cu Kamilah a probecha di bishita e hotel Holiday Inn Vitacura unda e atletanan di Aruba lo hospeda
durante dicho weganan. Segun Dammers ta un bunita hotel y e seguridad ta un prioridad. E zona en
general ta un zona cu hopi oficina di companianan grandi y esaki ta hasi cu e ta sigur den e area aki.
Hunto cu e asistente Camila Valdebenito cu lo brinda e delegacion di Aruba e asistencia necesario
durante e weganan a logra haya un recorrido y saca varios potret. Tambe e toca algun otro punto
importante manera e diferente ceremonianan, uso di diferente marca, prensa internacional y e programa
cultural cu nan lo ofrece cada pais durante e weganan Hubenil. Como Hefe di Mision, un punto hopi
interesante cu a resalta ta e magnitud di e trabou cu e ta tuma pa realisa y organisa eventonan di taya
manera e Weganan Sur Americano Hubenil.

Manera Kamilah mes a bisa cu como atleta hopi biaha bo ta yega e weganan y haya tur cos cla caba y
mester djis competi. Awor den su funcion como Hefe di Mision e ta wak e otro banda di e medaya.
Mester bisa cu COA cu su comisionnan tecnico y medico hunto cu e federacionnan deportivo cu tin
atletanan den preparacion ta trahando duro pa asina duna un bon prestacion na dicho weganan. No tin
duda cu nos atletanan lo hasi un bon papel na Santiago de Chile. Actualmente tin alrededor di 25 atleta
den 9 diferente disciplina ta preparando pa competi den e Weganan Sur Americano Hubenil 2017. E
deportenan aki ta Judo, Taekwondo, Natacion, Triathlon, Ciclismo Mountain Bike, Ciclismo BMX,
Ciclismo Road Bike, Tennis y Tennis di Mesa.