Page 43 - flip min.vos

Absentismo laboral den sector publico ta na 8.34% cu ta un cifra basta halto

Publication: Monday, 2 March 2015. Categoria: General

Director di SVb, Ir. Edwin Jacobs:

ORANJESTAD (AAN) – Den entrevista cu
director di SVb, tocante absentismo laboral den sector publico y sector priva, el a elabora riba e
cifra di AO den sector publico cu na Aruba, hasta internacionalmente, ta basta halto.

“Den sector publico nos ta mira cu absentismo ta keda un punto di atencion. Aña pasa el a baha
un tiki compara cu e aña prome, pero ainda e ta na 8.34 porciento.

Kiermen cu pa cada cien dia di trabao den sector publico, 8.3 dia no ta wordo traha pa motibo di
malesa. Internacionalmente tambe, e ta un cifra hopi halto, y pa por baha of contene esaki,
mester bin hopi instrument, tanto pa estimulo financiero, cu den experiencia di SVb mes por
mustra cu e ta yuda, y tambe mas control. Pero den sector publico en comparacion cu sector
priva, ora di papia di control hopi biaha den e departamentonan nan ta pensa cu e docter di SVb
mester controla mas rigido. Pero mi ta convenci cu hunto cu e departamentonan nos por
colabora y logra contene esaki. No SVb so, pero directornan di departamento y e hefenan mester
asumi e responsabilidad cu nan tin cu esaki. Si un persona den un departamento ta meldoziek den
un aña 15 biaha, y ni un hefe di e departamento ta yama e trahador aki puntre kico ta pasando,
anto no por expect cu e docter di SVb si ta bay hacie. Si e docter di SVb ta atende cu un trahador
cu ta bise cu e tin conflicto laboral na pia di trabao y cu e no ta haya feed back di e
departamento, e docter no sa e ora ey si tin of no conflicto laboral”, Ir. Jacobs a subraya.

WEBPORTAL:

Ir. Jacobs a referi na e webportal cu a wordo introduci na aña 2011, cu ta un instrument poderoso
pa por stimula e comunicacion entre e departamentonan di gobierno y SVb. “Tin algun
departamento cu ta haci uso di dje y ta logra mantene nan cifranan di AO, pero tin
departamentonan cu ainda no ta completamente conciente cu parti di e trabao di maneha un
departamento, tambe ta maneha su absentismo y e kehonan di e trahadornan”, Ir. Jacobs a señala.

Na SVb mes nan a mira un mehoracion den e ambiente di trabao, e ekiponan cu e personal
mester tin na nan disposicion pa traha, y e ultimo añanan SVb a haci hopi onderzoek pa sector
publico, y por mira un concientizacion y mehoracion ya cu e ambiente laboral ta impacta e salud
di e trahador y tambe su productividad.