Page 7 - AM210226

Diabierna, 26 Februari 2021 AWEMainta 7

Lamentablemente algun colega di

piso di Hospital infecta cu Covid-19

E siman aki Dr. Horacio E. Oduber Hospital a
haya su mes confronta cu coleganan cu a
test positivo pa Covid-19. Di biaha HOH a
cuminsa cu su “contact tracing” y a logra
saca afo e origen di e cluster aki.
E coleganan cu a test positivo ta den bon
estado di salud y ta na cas den isolacion.
Teniendo e seguridad di nos pashentnan y
coleganan na prome lugar a dicidi di cancela
algun operacion ayera y awe.
Diariamente ta evaluando e diferente
operacionnan cu tin cu tuma lugar hunto cu
staf medico p’asina tuma decisionnan cu ta
safe.

Lamentablemente e origen di e casonan
positivo a resulta bishitantenan di pashent
cu ta interna na HOH. Desde aña pasa a
introduci diferente regla nobo den cuadro di
Covid-19 p’asina protehe pashent y personal.
Tempo ta pasa y mester menciona cu
bishitantenan ta registra y drenta Hospital cu
nan tapaboca, pero ora nan ta den kamber
cu pashent no ta mantene distancia y ta kita
tapaboca.
Esaki tin como consecuencia cu pashent, sin
sa, a wordo infecta cu Covid-19, y a pasa
esaki pa algun colega den HOH.

Hospital un bes mas kier recorda tur hende cu
e reglanan t’ey pa un motibo y esey ta pa
protehe nos pashentnan y tambe nos personal.
No ta permiti drenta Hospital sin tapaboca y
semper keda haci uzo di handsanitizer cu tin
ubica na diferente lugar strategico na HOH.
Pashent interna cu Covid-19 no ta permiti pa
ricibi bishita. Pashent interna (non-Covid-19)
ta permiti solamente 1 (un) bishitante mayor
di edad.
E orario di bishita lo sosode na un orario fiho
cu un duracion di 1 ora. E orario fiho aki lo
ser comunica directamente cu e pashent/
bishitante p’asina por keda garantisa
distanciamento social den cada kamber.

Y bishitante ta obliga di mantene e mask bisti
henter ora cu e ta den HOH, pues no por kit’e
ora di bishita den kamber. Si un pashent cu
Covid-19 ta den fase terminal , e lo por ricibi
bishita di solamente casa y yiu(nan), pero
semper den cooperacion cu e departamento
concerni.

Hospital kier a manda palabra di bon
recuperacion pa coleganan cu ta na cas y
ta spera di por mira nan pronto bek na pia di
trabou y den bon salud. Tambe Hospital kier
pidi tur hende cooperacion p’asina hunto
nos por sali for di e momento fastioso aki. Nos
ta conta riba boso!