Page 45 - FDLP

Topcar A Felicita Nacional Nissan Cu Exitoso

Clausura Di Temporada 2017-2018 Y Dos Titulo

Campeón

 Local
- 25/07/2018

Recientemente Topcar N.V. a ricibi agradabel sorpresa for di Nacional Nissan –división
hubenil. Cu hopi alegría y entusiasmo e muchanan di U17 y U20, cada un Campeon di
nan división, a yega Topcar p’asina haci entrega simbolico di nan trofeonan di Campeon.
Topcar ta orguyoso di a wak un desaroyo positivo den e club y ta contento di por
confirma cu apoyo y sostén continuo na deporte ta duna fruto.

Pa añanan largo Topcar ta fiel patrocinador di Nacional división hubenil y tambe a sa di
sostene diferente deporte na Aruba.
Eddy Stenebome, General Manager di Topcar ta comenta: “Nos tin admiración grandi pa
nos teamnan hoben di Nacional. Den transcurso di añanan nos a wak nan bin hunto cu
hopi dedicación, positivismo, unión y un ‘can do attitude’ cu awe ta refleha den a logra
hiba cas dos titulo di campeón! Esaki ta un logro hopi grandi nos ta hopi orguyoso di
esaki.”

“Nos a yega na campeon dor di union, respet y bon comprendimento entre e muchanan y
mi persona. Semper mi ta bisa nan cu prome di ta un team nos ta un famia, cu cualkier
hende cu haci un fout nos ta coregi otro y motiva otro pa hacie mihor. Ora nos subi riba
veld nos ta sali cu mente positivo y semper cu gana di gana” esaki ta palabranan di
Teofilio Albus, coach di team U-17 di Nacional Nissan.

Topcar asina tambe kier a gradici henter e Team Nacional Nissan p’e bunita gesto y ta
desea nan un bon merecido vakantie y descanso p’asina por truinfa den e temporada
2018-2019.