Page 3 - AVB
P. 3
DEPORTE Diamars 13 Juni 2017
A19
RCA y Deportivo Nacional lo bataya pa titulo di campeon
ORANJESTAD - E campeonato di play-off 2016/2017 a
termina diabierna nochi. E 2 ekiponan cu lo topa otro
den final e biaha aki lo ta RCA y Deportivo Nacional.
Sport Vereniging Racing Club Aruba (RCA) cu a titula
campeon aña pasa, pues lo haci tur lo posibel pa mantene
su trofeo. Deportivo Nacional a titula campeon den e
campeonato 2006-2007, pues 10 aña pasa.
Diahuebs anochi RCA a sorprende Britannia cu un victoria di
1-0 cu gol di Jean-Luc Bergen. Na diferente ocasion ambos
team a busca pa pasa defensa pero na final RCA a bay cu e
victoria.
Diabierna anochi tabatin presion riba Dakota y Deportivo
Nacional pasobra ambos team kier yega final. Den e prome 10
minuut Dakota a bay ariba cu gol di Emile Linkers, mientras
cu faltando algun seconde prome cu e mita tempo termina,
Roy Francis Albert a empata e wega. E wega a termina empata
y esaki a pone cu pa averahe di gol Deportivo Nacional a pasa
pa final.
Diasabra 17 di Juni proximo e prome wega di “Best out of
3” di e final lo tuma luga, unda RCA lo ta defendiendo su
titulo contra Deportivo Nacional. Fanaticonan yega stadion
diasabra anochi y mira ken lo bay cu e prome victoria.
