Page 66 - MIN SJA 13 APRIL 2016

Despues di hopi yamada haci na City Inspector y Serlimar, accion a keda tuma den e bario di Noord
den casnan di pueblo pa un dump ilegal cu a keda traha pa e mesun hendenan cu ta biba ey banda
segun Danilo Prescott di Bureau City Inspector.

E ta splica cu den Bermudezstraat tin molester cu hopi di e muchanan hoben, ta cana rond y ta
benta tur sushi cu nan por haya. Esaki ta formando un dump, cu por forma peliger no pa un sino pa
tres of cuater cas. Si bin un candela, eynan tin articulonan cu por coy candela lihe y cu por plama
bay na e casnan.

Como City Inspector a acudi na FCCA y nan a keda di bay papia cu e habitantenan di e cas en
cuestion. City Inspector a pidi Serlimar pa duna un man pa haci e luga limpi. Ainda ta evaluando con
ta bay haci e costonan, si nan ta bay pa stad of dicidi di pone e costo riba esnan cu ta tirando e
sushi.

City Inspector lo monitorea e area. Tur dia lo tin un patruya pa wak e situacion y na momento si mira
algo cu no ta klop, e ora tin un indicacion ken ta esnan cu ta tira e sushi y ta tacklenan di biaha.

E tipo di cosnan aki ta daño pa nan mes. City Inspector tin contacto cu un di e bisiñanan y a bay
asina leu cu riba su propio costo, a haci e luga limpi. Esaki ta un caso serio. Mas pariba di e casnan
tambe tin un otro minidump y e ta molester pa tur e habitantenan, pero ta keda na nan mes pa nan
mantene nan bario limpi. City Inspector y Serlimar por keda haci limpi, pero a final, nan tin di
mantene limpi. Ta yega un caminda cu Serlimar ta bisa ta basta. Y ora nan bisa ta basta, ta kico e
ora.

E area aki ta un area chikito y un auto no ta drenta facil. Por cera e area aki con cu ta, pero asina
mes na pia, nan ta bin tira e sushinan. Loke tin cu haci ta pa concientisa nan mes cu esaki ta un
peliger. Si e sushi aki coy candela, ta tur e casnan cerca ta core peliger.