Page 32 - WEB

Minister Presidente mr. Evelyn Wever-Croes, a expresa esaki den conferencia di prensa.
E MOU aki ta habri e caminda pa gobierno por delibera cu companianan cu ta interesa
pa tuma e refineria over.

E dignatario a papia di un lista di mas cu 25 compania cu kier negocia cu gobierno, e
ultimo temponan aki. Algun tin oferta masha interesante, sinembargo gobierno no por a
drenta den negociacion pa haya sa con serio nan ta, y si nan ta califica pa por maneha
un industria manera Aruba tin.

“Pero esaki awor si a bira posible y mi tin cu bisa cu nos como gobierno no ta bay limita
nos mes, solamente na e 25 companianan aki, si no cu nos ta bay hacie activamente y
busca otro interesadonan tambe.

Na Washington ya caba nan a pidi nos pa haci un roadshow hunto cu nan na Houston,
pasobra eynan tin mas inversionista cu tambe tin interes” Prome Minister a duna di
conoce.

“Nos meta ta pa haya e mihor partner pa Aruba y esey ta loke nos ta bay busca. E
comision cu ta bay wordo encarga cu esaki ta bay wordo forma dentro di poco. Aworaki
nos a atende cu e comision cu a negocia pa nos sali for di e contrato, pero awo tin un

otro comision cu ta bay ta encarga pa nos busca un partner adecua y ideal pa Aruba. Y
riba peticion di e sindicatonan, empleadonan tambe lo wordo envolvi den e proceso
aki”, Prome Minister a subraya.

El a acentua cu gobierno ta buscando un partner serio, cu tin fondo, cu por inverti
mesora den e refineria pasobra e ta falta mantencion. Kiermen, cu por inverti mesora
pero no djis pa e keda riba e idea di un upgrading.

“Nos ta buscando un partner cu kier upgrade y mehora e refineria, hacie un ‘state of
the art refinery of industry ‘, pa asina e cumpli cu standardnan medio-ambiental, cu ta
paga su fairshare, ta trata su trahadornan bon, y cu e ta un bon partner pa Aruba en
general” Minister Presidente mr. Evelyn Wever-Croes a duna di conoce.