Page 13 - AHATA

guia di Tony Green a forma hopi hoben riba e tereno di horeca riba diferente tereno y nos a mira nos
hendenan local educa y prepara nan mes pa a forma parti di un desaroyo asina importante cu a
converti su mes awendia den e pilar economico mas grandi di nos pais.

E nomber real mes di e centro di preparacion y educacion aki tabata The Aruba Hospitality Trade
Training Center cu realmente a pone e base pa loke awe ta sigui wordo duna na scolnan manera EPB
y EPI.Prome cu esey e industria economico mas grandi tabata e refineria Lago pero e

desaroyonan turistico grandi cu nos pais a conoce, a percura pa Aruba supera e crisis economico y
social grandi cu a surgi na momento cu e refineria a dal su porta cera.Hopi cu tabata labora den e
refineria a bin haya trabou den e sector turistico y hotelero y centenares di hobennan local, a sigui

nan specialisacion na loke nos tabata conoce como Hotelvakschool, cu a bira e base di e exito di nos
industria aki.

Hobennan bon prepara cu a percura pa duna Aruba e apodo di “One Happy Island” pa e forma con a

percura pa nos tin hendenan laborando den e sector hotelero cu por atende cu nos bishitantenan di
rond mundo, den e miho forma posibel, comunicando den varios idioma y lagando nos bishitantenan
sinti nan mes na cas.Lamentablemente ultimo añanan Bushiri Beach Hotel a pasa den un proceso cu

mas bien nos por cataloga como un desaroyo politico, caminda clausura di e hotel a bira un
argumento politico y intentonan a wordo haci pa logra un grupo interesa pa cumpra e hotel y habri
esaki.

Un tempo den un triki politico, a claba cantidad di hardboard rond di e edificio di Bushiri Beach
Hotel, cual triki sin duda tabatin su efecto politico pero cu nunca a cristalisa den su apertura.Por
ultimo tabata den negociacion cu a cadena hotelero Hard Rock Cafe cu no a logra cristalisa y despues
definitivamente a bay over na tuma e decision pa basha e hotel abou y entrega e tereno bek na

pueblo.

E trabou di limpieza a tuma luga caminda a percura pa laga e flora cu tin riba e tereno intacto y cu ta

percura awor pa un bista sumamente agradabel y bunita cual ya caba tabata un beach hopi accesibel
pa habitantenan di Eagle, Madiki y Bushiri, kendenan tabata uza e sitio aki tambe den e periodo di
campamento.Mientras cu ainda tin politico- y gobernantenan ta papia di converti e sitio aki den un
centro deportivo pa beach vollyball y otro deportenan di beach, pa gran parti habitantenan di e

barionan ey banda ta prefera di keda cu nan beach cu ta mas accesibel awor.