Page 33 - ARUBA BANK
P. 33
ORANJESTAD (AAN): Dialuna mainta,
Minister di Finanzas, Xiomara Maduro a haci un anuncio importante pa comunidad.
El a duna di conoce cu tin un cambio pa loke ta e fecha di pagamento di impuesto riba
vehiculo di motor.
Siman pasa e directora di Departamento di Impuesto (DIMP) a brinda informacion
relaciona cu e pago di impuesto e aña aki.
Te 31 di Januari tabata tin oportunidad pa paga mitad aña y na fin di juni e otro mitad
di e impuesto di vehiculo di motor 2020.
E aña aki, e mandatario a splica, hunto cu e pago di e impuesto locual no por realiza ta
e entrega di e plachi di number. Esaki a trece cune un disgusto den comunidad.
E minister a duna di conoce cu e aspecto aki no ta kita afo cu cada ciudadano cu ta haci
uzo di un vehiculo di motor mester cumpli cu e pago aki. Pero pa evita e discusion cu a
bin dilanti a dicidi cu ta bin un cambio den esaki y ta permiti pa por paga mitad aña te
cu na 28 di Februari.
Esaki ta bira e ultimo dia pa por paga mitad aña (Januari – Juni) di locual ta number pa
e aña aki, Maduro a indica.
PAGO ONLINE
Tin posibilidad pa por haci pago online. Den esaki a haci algun cambio chikito pa locual
ta bira e comprobante di pago. Antes mester tabata tin e comprobante di pago aki
pasobra tabata tin personanan cu ta paga pa e aña aki, pero aña pasa of e aña prome,
nan no lo a paga.
