Page 16 - AM210308

16 AWEMainta Dialuna, 8 Maart 2021

Homber a menasa ex pareha y e guy nobo di su ex cu morto

Diadomingo algo pasa di mey anochi, presencia di varios
patruya di Polis a wordo pidi na un cas na Kamay, pa un
persona cu lo tabatin un arma di candela den su poder y
lo a menasa hende.
Mesora e patruyanan Noord, Oranjestad y Santa Cruz a
bay cu urgencia n’e cas. Na yegada mesora e agentenan
policial a actua y a logra detene e sospechoso, pa motibo
cu el a menasa hende y supuestamente e lo tabatin un arma
di candela den su poder. El a keda deteni y transporta cu
transportwagen di Polis pa Warda di Shaba.

N’e sitio nan a bin compronde cu homber aki a yega n’e
cas y sin permiso a drenta den e apartamento di su ex
pareha. El a cuminsa haci problema, el a menasa su ex
pareha y tambe e pareha nobo di su ex cu morto.
Polisnan n’e sitio mesora a cuminsa cu un buskeda p’e
supuesto arma, pero nan no a logra haya niun arma di
candela. Mientras cu Polis tabata tumando declaracion
di e dama y su pareha nobo, nan a conta cu e homber a
menasanan tambe via telefon. Un bentana di e apartamento
a wordo kibra. P’e destruccion aki Polis a detene un otro
persona n’e sitio.

Dos persona seriamente herida den

un accidente di trafico na Camacuri

Diabierna algo prome cu 11’or y mey di anochi a sosode
un accidente basta serio riba e caminda principal di
Oranjestad pa San Nicolas, na altura di e ex veld di
Camacuri. Un Nissan Sentra a perde control, a baha
caminda y a dal den un mata di Kwihi. E chauffeur y e
ocupante a keda herida. Mesora a pidi pa presencia di
Polis y di ambulance cu maximo urgencia.
Na yegada enberdad nan a bin topa cu e Nissan Sentra
band’i panort di caminda, e auto tabatin hopi daño
material y den e auto tabatin dos persona herida. Na
prome instante a pensa cu e dama ocupante lo tabata
pega den e auto y mesora a pidi pa materiaalwagen di
Brandweer.

N’e sitio nan a bin compronde cu e Nissan Sentra tabata
bayendo direccion pariba y na momento cu e chauffeur
di e Nissan Sentra a bay pasa un auto, e lo a wordo sera
pa un otro auto y esaki a pone cu el a perde control,
baha caminda y a dal contra un palo di Kwihi. E impacto
tabata hopi fuerte. E chauffeur tabata keha di dolor di
lomba y e dama tabata sangrando bastante na su cara.

Tres ambulance y e Rapid Responder a presenta n’e
sitio. Mesora a cuminsa trata e chauffeur n’e sitio y
despues e paramediconan a hink’e den ambulance.
E personal di ambulance mes a logra saca e dama
ocupante for di e auto, ambos a wordo transporta
pa hospital. Materiaalwagen a yega n’e sitio, pero no
tabata necesario mas, pasobra ya e victima a wordo
saca for di e auto y hinca den ambulance.

Varios unidad di polis di Oranjestad y Santa Cruz tabata
n’e sitio y a sera e caminda for di e Rotonde Las Americas
te n’e crusada di Pricesmart. Polis di Trafico tambe a
presenta n’e sitio pa haci mas investigacion.