Page 8 - ATA

E siman aki, e premiacion anual di Hospitality Sales & Marketing Association International
(HSMAI) a presenta Aruba Tourism Authority (A.T.A.) y nan agencia ‘The Concept Farm’, cu 11
diferente premio pa innovacion den e mercadeo di viahe durante e di 60 Adrian Awards. E categoria
den cual e honornan a wordo nomina ta entre otro Social Media, Mobile Marketing, Virtual Reality y
Website User Experience.

“Nos mision ta pa nos ta e Destination Marketing y Management Organization mas innovativo y
creativo den Caribe.” asina Ronella Tjin Asjoe-Croes, CEO di A.T.A. a laga sa. “Adrian Awards ta
representa e mihonan den e mundo di e industria aki y nos ta sumamente honra y orguyoso cu e
diferente reconocemento pa tur nos esfuerso y creatividad, principalmente considerando cu Aruba ta
e destinacion cu mas premiacion. Un danki y felicitacion na e ekipo completo di Merca cu mas cu
claro ta ser sostene door di e ekipo na Aruba. Pabien!”

Ademas, Aruba a wordo otorga cu un ‘Platinum Award’ pa un asina yama ‘breakthrough’ riba e
rednan social cu un iniciativa yama “Happy People Read Sad Tweets” como tambe Aruba a wordo
reconoci cu un premio special ‘Libris Pioneer’ pa su ‘Visual Storytelling’ cu e mapa interactivo “360
Map of Happiness.”

Como e isla number dos riba e lista mundial cu ta depende di turismo, nos mester ta sigur cu Aruba ta
destaca den e lama Caribense compara cu tur otro destinacion. Buscando maneranan diferente y
atractivo pa asina participa den e area digital ta loke realmente ta haci Aruba diferente for di e otro
destinacionnan.

Tacticanan progresivo di mercadea e producto a contribui na Aruba su logronan pa ricibi
bishitantenan como tambe pa incrementa loke e bishitantenan ta laga atras den nos economia y
aumenta e ocupacion den nos acomodacionnan. Loke A.T.A. y su agencianan ta trata di haci ta trata
di expone tur e atributonan atractivo di Aruba pa medio di mercadeo, entre otro digital.

Adrian Awards 2017 ta marca e di tres aña consecutivo cu A.T.A. conhuntamente cu ‘The Concept
Farm’ ta ricibi e reconocemento Platinum pa su esfuersonan, di cual aña pasa esaki a wordo gana cu
e campaña “Local Shortcuts”. Desde 2012, A.T.A. a bay ‘all out’ riba e caminda inovativo digital,
cual a laga Aruba gana varios premiacion, entre otro Adrian Awards, multiple Travel Weekly
Magellan Awards como tambe e prestigioso Effie Award.