Page 56 - CITGO

Ta haya personanan cu ta bay riba dump, kisas cu documentonan cu nan kier kima, nan ta
sende un candela chikito y ta lubida cu e candela chikito ey mes, considerando e cayente
y composicion di desperdicio cu tin eynan, un tiki di e as ey por bula y sende candelanan
bastante liher. Algo sumamente peligroso pa motibo cu na e sitio tin di haber cu diferente
gas.

REMEDIACION PARKIETENBOS

Oduber ta splica cu actualmente ta den e proceso di remediacion di dump Parkietenbos
como tambe procesamento di sushi aki na Aruba. Siman pasa a ricibi rapport di e dos
comisionnan cu ta integra den e Task Force di Waste Management. TNO a encabesa e
parti di remediacion na dump Parkietenbos y personal di WEB tabata encarga cu e parti
tecnico den e comision pa locual ta trata e procesamento di sushi.

E direccion cu kier bay ta hopi cla na e momentonan aki. ‘Mi no a duna aprobacion riba e
rapport ainda, sinembargo tur indicacion ta cu ta papia di un incinerator pa crea sea gas of
coriente, den un ambiente transparente y habri. Lo tin un destaho publico cu lo tuma luga
(cual otro luna ta sali), cu ta significa cu ta habri e posibilidad na esnan cu a participa den
e proceso caba, pero tambe pa otronan cu tin interes pa participa’.

Por participa sea pa e remediacion di dump Parkietenbos 1. Tapando tur locual cu tin na e
sitio, of 2. (locual cu mayoria compania a menciona) cu poco poco lo baha e seronan di
sushi door di hinka e sushi den un incinerator pa produci gas of coriente pa di e forma aki
‘clean up’ e area y reduci e seronan. Tur esaki na un forma hopi responsabel unda cu ta
percura na un forma profesional cu e particulanan di sushi cu tin na e momentonan aki na
Parkietenbos no bay molestia e area, e mandatario a splica.

Ta papiando di un inversion cu mester bay tuma luga di sigur rond di 150 pa 200 miyon
dollar pa loke ta ambos fase, algo cu ta sumamente necesario cual no tin tempo mas pa
pospone. Esaki a wordo poni hopi cla den e ultimo rapport cu tabatin di e organisacion
PAHO. Kiermen peticion special na nos comunidad pa ta alerta cu e incendionan cu ta
tuma luga riba dump. NOTA: E potret ta un muestra di un incinerador, pero no
necesariamente esun cu ta bin pa Aruba.