Page 56 - MIN ECEM

Comercio y artistanan trahando hunto pa celebra Dia di Tata

Tuesday, 13 June 2017 18:50
Comparti

Oranjestad Business Improvement District (OBID) ta trahando hunto cu comerciantenan y artistanan
local pa diasabra awo ofrece e comunidad di Aruba un dia di hopi bon ambiente y bon ofertanan pa haci
compras di Dia di Tata. Ta papia aki di descuento, musica, barbershop y cerbes gratis, y esey ta djis pa
cuminsa.

OBID a comparti cu prensa tur detaye di loke tin prepara pa diasabra awo durante un conferencia di
prensa cu a tuma luga na sede di Beam. Aki Kimberly Kuiperi hunto cu Michael Lampe di BEAM, Ilan
Lopez di CMB y Mitch Bermudez di Tropical Bottling Company a hiba palabra. Celebracion di Dia di Tata
lo consisti di, entre otro di weganan cu e chens di gana diferente premio for di e comerciantenan di Caya
Grandi. Tiendanan ta ofreciendo tambe nan miho ofertanan bou di tentnan pafo di e tienda. Tur e
actividadnan aki ta conta cu apoyo grandi di Caribbean Mercantile Bank cu ta kere den iniciativanan pa
fomenta actividad comercial den Caya Grandi. Entre otro diasabra awo Gelatissimo Bistro na Plaza
Daniel Leo ta ofrece diferente actividad pa mucha y riba e dia aki so lo tin oferta di cumpra un ice cream
y haya un otro gratis. Banda di esey lo tin un ‘Pop Up Barbershop’ danki na Aruba Bank ubica na e plasa
banda di su oficina den Caya Grandi. Aki lo atende e prome 65 tata. For di 4’or di atardi lo tin un show di
autonan clasico di Aruba Muscle Classic Car Club. Tur esaki ademas di bon musica, lo percura pa un
dushi ambiente den Caya Betico Croes. Tambe lo tin cerbes craft, 24ice y un food festival dedica
specialmente na Dia di Tata. For di 5’or di atardi, BEAM cual ta un iniciativa di artistanan local lo tene un
evento yama ‘Cuts & Beers’ caminda tur e tatanan cu yega na e edificio di ex El Mercado lo haya un pela y
Tropical Bottling lo duna nan un cerbes tambe. Tanto e pela como e cerbes ta gratis. Pa e motibo aki y
hopi mas, bo tin cu bishita Caya Grandi diasabra awor y busca e regalo special pa e tatanan special den
bo bida. Gobierno di Aruba ta gradici tur comerciante y tur boluntario cu ta trahando hunto cu OBID pa
asina trece ambiente y fluho di persona pa centro di ciudad. Ta spera cu nos comunidad lo sa di probecha
y disfruta di e evento den Caya Betico Croes pa Dia di Tata y di antemano ta desea tambe tur tata di
Aruba un feliz dia.