Page 11 - Djaluna 5 mart 2018.pdf

Djaluna 5 Mart 2018 11

Cft no ta aprobá konsepto di

presupuesto pa 2018 di Sint Maarten

WILLEMSTAD. - Kolegio
Supervishon Finansiero
(Cft) no a duna un konseho
positivo riba e promé vershon
di presupuesto pa aña 2018
di Sint Maarten. Segun e
presidente di Cft Raymond
Gradus e konsepto no ta
kumpli ku e normanan di e
Lei di Reino Ulandes tokante
supervishon finansiero.
Den e promé vershon di e
presupuesto a menshoná un
défisit di 254,7 mion Naf, ku
no ta permití den lei di Reino
sin aprobashon spesífiko
di Konseho di ministernan
di Reino. Den e promé
vershon di e presupuesto
ta menshoná ku e kousa di
e défisit grandi ta un défisit
di 217.7 mion Naf di ingreso
i 61 mion Naf di gastunan
adishonal. Kasi tur di esaki
tin di aber ku e konsekuensia
di orkan Irma.
E presupuesto, den e
konsepto, a menshoná un
montante di 266.8 mion na
ingreso i 521.7 mion Naf na
gastunan.
Presidente di Kolegio
Supervishon Finansiero
Raymond Gradus a skirbi
den un karta, ku fecha 9
di febrüari 2017, pero ku a
keda lansa 2 di mart dor di
Cft ku Kolegio Supervishon
Finansiero no ta mira
sufisiente estado finansiero
di aña 2016 i 2017. Basá
riba esaki Cft a bin ku
diferente pregunta tokante
realidat di e sifranan ku a
keda presentá.
Gradus a skirbi: ‘Cft no
por evaluá si tur e ingreso i
gastunan a keda presupuestá
manera e ta stipulá den Lei
di Supervishon Finansiero.’
Ingreso di gastunan tin
di aber ku orkannan Irma
i Maria i ‘e problemanan
kontinuamente ku IT na
Sint Maarten’. Segun Cft e
konsepto di presupuesto no
ta kumpli ku e normanan
vigente. Segun Cft tin ku
tuma den konsiderashon
ku tin bastante inseguridat
riba situashon finansiero
i ekonómiko, debí na
orkan Irma i Maria. Pero
segun Cft den e konsepto
di presupuesto ta falta
sufisiente informashon
den e sifranan tokante
ingreso fiskal i tokante
oumento konsiderabel di
e gastunan. Cft ta bisa ku
e splikashon di esaki no ta
kuadra ku normanan di lei di
Supervishon finansiero.