Page 44 - DE MEZA_Neat

Habitantenan ta hiba Ministerio

Publico Corte pa dump ilegal di asbest

Posted on 05/4/2017 7:27 pm AST | Updated on 05/4/2017 7:31 pm AST

ORANJESTAD – E pareha De Vries a entama un caso contra Ministerio
Publico (OM) su decision pa no actua contra e dump ilegal di asbest riba tereno di
refineria na San Nicolas. Nan kier pa Corte Superior duna ordo pa OM cuminsa
persecucion di esunnan culpabel.

Segun informacion ricibi, riba 11 di october 2016 e habitantenan a logra di haci un
denuncia na polis, despues varios intento. Esaki tabata contra e dump di asbest cu na e
momento ey ainda tabata andando riba e tereno di refineria, mas o menos 40 meter for di
e curanan den Fort Heuvelstraat. Asina mes nan no a warda e asbest den un forma
adecua, causando te dia di awe un peliger pa e salud di e habitantenan.

Tin un multitud di leynan penal viola den e caso aki, sinembargo Ministerio Publico ta
nenga di actua y persigui esunnan culpabel. Asina e famia ta bisa. Segun e famia, OM a
declara cu nan ta haya cu otro instancianan di gobierno (caminda administrativo y no
hudicial), mester actua. Pero e habitantenan a bati alarma hopi biaha caba cerca e
instancianan concerni. Manera brandweer, Dienst Technische Inspectie (DTI),
Departamento di Naturalesa y Medio Ambiente y City Inspector.

E habitantenan tambe a skirbi varios carta pa minister di Husticia Arthur Dowers y prome
minister Mike Eman, expresando nan preocupacion. “ Niun di e instancianan menciona,
ni e mandatarionan a actua” e famianan ta sigui bisa. Mientrastanto segun nan maneho y
e leynan aplicabel mester a tuma accion contra e dump. Asina esunnan culpabel por a
haci locual cu nan kier, y esaki ta locual nan a haci tambe, esta keda dump e asbest, trece
bida di hende den peliger.

“E situacion negativo aki ta domina nos bida. Tur dia nos ta lanta cu esaki; e ta e prome
cos cu nos ta mira ora habri nos cortinanan. Nos sentido ta uno di duda y di ta manca: con
esaki por a sosode y kico mas nos por spera: e riesgonan pa nos salud, nos cas cu ta baha
den balor”, asina e pareha De Vries ta expresa nan dolor. E pareha ta sinti su mes
bandona door di e instancianan y tambe husticia. “Nos no ta experiencia niun proteccion,
al contrario mas menasa. Nos gusto di biba aki pero tambe nos gana di biba felis den e
ultimo fase di nos bida, a bay perdi.” No a logra haya contacto cu OM pa un reaccion di
nan banda.

http://www.noticiacla.com/news/9510