Page 72 - MIN JUS

Comparti

Dialuna den oranan di atardi Prome Minister Mike Eman tabata den bario di Angochi pa dos evento. E
prome tabata e groundbreaking di e mini-cancha deportivo y inauguracion oficial di dos verkeersplateau
cu a wordo construi recientemente.

“Mi ta hopi contento. Un palabra di gradicimento na DOW pa e hecho cu e lista di e proyectonan aki cu
nos ta entrega na nan despues di bishita na barionan, poco-poco ta kedando cla. Den tur e barionan cu a
haci peticion pa verkeersplateau of iluminacion, ta hayando esakinan,” Prome Minister Mike Eman a bisa
den presencia di un grupo di habitante di e bario.

E mandatario a recorda tambe, den cuadro di e proyectonan aki, cu algun luna pasa ora el a bay Hulanda,
a firma un acuerdo cu Minister Plasterk pa aloca e resto di fondonan di FDA pa mehora infrastructura,
specialmente camindanan afecta pisa pa e yobidanan recien, pero tambe pa e areanan unda cu pa algun
aña caba ta pidiendo caretera. “Ta berdad tambe cu e cantidad ta hopi grandi, pesey nos a cuminsa cu e
cantidad cu nos por a aloca denter di e presupuesto cu nos a logra combina cu e resto di placa cu a keda
di FDA.”
En total a pone 2 verkeersplateau, pa yuda baha velocidad di e autonan cu ta pasa den e area aki, cerca di
e veld unda tin hopi mucha ta hunga. E atardi ey e mandatario a sinti un alegria grandi di mira cu su
Gobierno a cumpli cu e bario di Angochi.

“Mi ta hopi contento cu awe mi ta para aki cu rumannan Morillo na Angochi, unda verkeersplateau a
wordo poni. Hopi locual nos conoce den cambionan den Angochi y deporte ta danki na empeño di e
famia aki. Cada bes cu mi bishita ta haci un apelacion riba gobierno pa duna un man.” A recorda
proyectonan manera renobacion di clubhuis di Arsenal, construccion di tribuna y awo ta realisacion di e
mini-cancha deportivo (veld artificial) cu ta wordo realisa cu contribucion di Comite Olimpico Arubano,
dirigi pa sra. Nicole Hoevertsz cu intermediacion di Ditto Acosta. Esaki ta e prome di un serie di seis cu
ta bay construi rond Aruba, pa Santa Cruz. Otronan lo wordo construi na Centro di Bario Ayo, Bubali,
Dakota, Primavera y La Fama. “Tur esaki ta parti di e trabounan cu nos ta haci pasobra ora cu a bishita e
barionan a haya informacion di habitantenan di kico ta nan deseo y prioridadnan. Nos a traha riba nan
peticion y a cumpli cu nan. Unda cu nos por a yuda y lo sigui yuda.” Pesey e mandatario ta haci un
apelacion na ciudadanonan pa mira rond den barionan y rond di Aruba riba e trabounan cu a wordo haci.
“Si e no a yega bo bario ainda, djis tin pasenshi, meta di nos ekipo ta pa e felicidad y e cambionan aki
yega den tur bario di Aruba.”