Page 108 - MIN VOS

Inscripcion Olympic Day Kids Run 2017 habri ainda

Tuesday, 13 June 2017 19:57
Comparti

Comite Olimpico Arubano den cooperacion cu IBiSA pa algun aña a inclui den e programa di deporte
escolar e Olympic Day Kids Run.
E competencia aki ta forma parti di e celebracion mundial di Olympic Day cual ta e celebracion di
Movimento Olimpico riba cual ta celebra e re-nacemento di e Weganan Olimpico Moderno.
E aña aki e Olympic Day Kids Run ta tuma lugar riba diasabra 17 di juni na Marine Verlof Center Eagle
Beach y ta cuminsa pa 8 or di mainta. Pa 7 or di mainta e participantenan por buscanan number y nan t-
shirt.
Na e evento aki historicamente masha hopi mucha ta participa y esaki ta netamente e meta di Comite
Olimpico Arubano tambe. Un di e metanan principal ta pa duna mas tanto mucha posibel un
oportunidad pa participa na un evento deportivo. Pues pa e competencia aki e participacion di e mucha
ta importante y no pa mira specificamente ken a gana y con duro a core. Pa e motibo aki e distancianan ta
relativamente cortico pa asina tur mucha – si e ta den bon condicion fisico of no – por completa e
distancia.
Manera anuncia anteriormente e competencia aki ta specificamente pa muchanan di scol y pa duna tur
mucha oportunidad pa participa ta anuncia cu ainda inscripcion ta habri.
Pa registra e mucha mester haci esaki via su scol. Pero den caso cu e scol no a inscribi e mucha ainda e
mayor por acudi na IBiSA pa haya e formulario di inscripcion pa despues laga e scol firma y stempel
esaki.
Scolnan cu ya caba a inscribi ta Colegio San Hose, Mon Plaisir Basisschool, Colegio Bon Bini, St.
Annaschool, Fatima College, Mariaschool y Faith Revival School.
Naturalmente tur otro scol basico y scol avansa ta keda cordialmente invita pa inscribi nan alumnonan
pa e Olympic Day Kids Run 2017.
Un invitacion special ta bay pa e hobennan di 14 y 15 aña. E aña aki a habri e posibilidad pa nan tambe
participa na e competencia aki. Nan lo core un distancia di 3 km.
Comite Olimpico Arubano ta gradici Mc. Donalds, Totto Aruba y IBiSA pa nan contribucion pa haci e
Olympic Day 2017 posibel.
Pa mas informacion por tuma contacto cu IBiSA na tel. 5824987 y puntra pa Edgard Erasmus of Junior
Daké.