Page 9 - MIN VOS

Maltrato Fisico: kinipi, pusha ranca, dal, sacudi, laga un persona cay, mara un
persona of duna un persona remedi incorecto

Maltrato emocional: p.e. zundra, intimida, menasa, humilia, kita su
contactonan social

Abuso financiero: haci mal uzo di e entrada di e grandinan cu no por maneha
nan propio asuntonan financiero mas

Negligencia fisico of emocional

Violacion di nan derechonan p.e. riba privacidad

Considerando cu e grupo di hende mayor di edad cu mester di cuido na nan
propio cas ta creciendo y cu e famia mas cerca ta esunnan cu ta carga e
responsabilidad pa e cuido aki, banda di nan tareanan diario, ta di compronde cu
esaki por causa situacion di extra tension y peso pa famia. Situacionnan asina
por resulta den maltrato of abuso di e hende grandi. Mayoria biaha esaki no ta
tuma luga intencionalmente, pero como resultado di frustracion, ignorancia,
impotencia y pasobra e carga ta bira mucho pisa pa un solo persona.

Abuso y maltrato di nos grandinan ta un forma di violencia domestico, e hende
grandi ta depende di esun cu ta encarga cu e cuido y e relacion aki di
dependencia ta pone cu e no por defende su mes. Ta importante pa diferente
profesionalnan den nos comunidad para keto na e problematica aki y ta alerto.
Nos mester conscientisa nos mes riba e tereno di maltrato y abuso di hende
grandi, siña conoce e señalnan y haci hopi pregunta ora ta sinti cu algo no ta
corecto. Ayudo y sosten na esunnan cu ta duna cuido den hopi caso ta e solucion
y por yuda un persona pa sali for di su situacion doloroso.Ta sumamente
importante pa señala e situacionnan asina y busca ayudo na tempo. Ayudo por
wordo busca y organisa den famia mes door di reuni cu otro y reparti e
diferente tareanan cu tin. Ayudo profesional tin den diferente forma y for di
diferente organisacion. Informacion of conseho por haya semper cerca diferente
instancia cu ta traha riba tereno di cuido y/of guia, por ehempel: cerca un
trahado social di Departamento di Asunto Social, na Dienst Ouderenzorg di
Departamento di Salud Publico of na Wit-Gele Kruis.