Page 6 - DIMP

ORANJESTAD (AAN): Vocero di Departamento di Impuesto, Meverly Romano a duna di
conoce cu tur cliente mester tene cuenta cu ora cu no haci un pago di impuesto,
automaticamente un carta cu boet (naheffing) ta sali bay na e adres di e persona.

El a menciona cu por ehempel, si un deadline pa paga tabata 2 di Juli, dia 3 di Juli e
boet ta sali ariba nomber di e persona of compania. Esaki ta bay den forma digital den
e sistema di DIMP.

Esnan cu ainda no a paga nan number di auto pa e prome mitad aña, por ehempel, nan
lo haya un naheffingsaanslag cu un boet di 50% ariba e suma cu nan mester a paga.
Kiermen, si nan belasting pa number di auto ta 300 florin, e boet lo ta di 150 florin, pa
un total di 450 florin ademas di e 20 florin cu ta e gastonan di e plachinan.

Esnan cu no a paga belasting di auto lo mester ta coriendo cu un plachi falso y esey ta
completamente ilegal, Romano a remarca.

Tin 11097 persona cu no a cumpli cu e pago, esaki segun datonan di e siman aki. Den e
cantidad aki, e categoria mas grandi di incumplimento ta e categoria A (3682 cu a paga
mitad aña so) y 6077 cu no a paga nada mes di 2019.

Kiermen den total pa categoria A tin 9759 persona cu no a haci pago mes of cu no a
paga completo of cu no tin pago pa 2019, Meverly Romano a señala.

Esaki ta un cantidad basta halto si wak cu ta mitad October caba. E deadlines tur a

pasa y por bisa cu ainda tin casi 10 mil plachi A cu falta pa cumpli cu e pago. DIMP ta
lamenta esaki pero alaves ta haci un apelacion na e doñonan di vehiculo di motor pa
haci e pago.

E boet cu nan a haya caba ariba nan nomber por medio di e naheffingsaanslag, esey
DIMP no ta bay kit’e, pero toch ta un gasto innecesario pa e cliente cu no tabata tin
mester pa sosode, a remarca.

E saldo ta keda habri y ta preferibel pa haci e pago mas lihe posibel. Un djis aña ta
cambia y ta bay bin e belasting di 2020 y e debe ta keda bira mas halto. “Keda pospone
e pago ta nifica gasto extra pa e persona.