Page 15 - BNDIA ARUBA

A15
HENDE Dialuna 16 Juli 2018

Thais Franken a gradua na Universidad di Aruba

ORANJESTAD –
Recientemente Thais
Franken a defende su tesis
exitosamente dilanti di e
comision di graduacion
cu tabata consisti di dr.
Luc Alofs, drs. Yolanda
Richardson y Zulema
Dabian-Erasmus, M.A.

E defensa di e tesis a tuma
luga dilanti di un audiencia
mixto di famia y studiante
den Aula di Universidad di
Aruba.

Thais a haci su pasantia na
Departamento di Economia,
Comercio y Industria
(DEZHI). Aya su pasion
pa cultura y su interes
den e tema di ‘Sustainable
Development Goals’ (SDGs)
den e area di cultura y
creatividad, cu lo por ta un
posibel pilar economico nobo
pa Aruba, a crece mas y mas.
Prome cu esaki Thais a haci
un intercambio educacional
na Belgica y el a haci un
summer course na Haagse
Hogeschool. Como studiante
Thais tabata assistent di dr.
Luc Alofs den cuadro di e
proyecto Travelling Cultural
Heritage, cual proyecto
ta financia pa Instituto
Hulandes pa investigacion
cientifico (NWO). Esaki ta
segun e comunicado cu nos
a ricibi.

Den cuadro di su tesis
Thais a studia entre otro
documentonan nacional
di maneho economico,
documentonan di Unesco
y documento cu ta investiga
con paisnan cu un economia
chikito (SIDS) por atende
cu e tema di Sustainable
Development. Tambe
e graduado a haci un
inventarisacion di recursonan
cultural y creativo di
Aruba. Thais a entrevista
16 representante den e veld
cultural y creativo y e la
haci un SWOT y TOWS
analisis. E analisis a duna 28
strategia cu lo por facilita
un desaroyo di un niche
nobo na Aruba den e area di
cultura y creatividad e asina
yama Culture and Creative
Industries (CCI).

Thais awor ta bay haci su
master na Universidad di
Maastricht.
Universidad di Aruba,
particularmente e
departamento di
‘Organization, Governance,
and Management’, ta felicita
Thais cu e logro aki y ta
desea e tur clase di exito na
Maastricht.