Page 17 - AVP

E entrada di Juan Guaidó no a duna Nicolas Maduro e oportunidad pa cana manera el a
visualisa, pero na e momentonan aki mundo ta sigui puntra su mes kico e desenlace di
e situacion na Venezuela lo bira.

Ayera atrobe Nicolas Maduro a demostra su poder, ora el a laga su hendenan na
nomber di inspeccion di siguridad, podera di e edificio di Asamblea Nacional y a cambia
e yabinan di porta di Asamblea Nacional.

Den e organo legislativo cu e tin bou su poder, cu ta Asamblea Nacional Constitucional,
invencion i Hugo Chavez, ayera a cay e decision cu e forsa militar civil, cu Nicolas
Maduro a arma, a bira parti oficial di Forsanan Arma di Venezuela.

Informacionnan financiero internacional ayera tabata papia di e hecho, cu Rusia a dicidi
cu e ta baha su propio produccion di azeta, cu ta bira demasiado costoso. Rusia ta bay
ocupa su mes mas cu exploracion nobo y desaroyonan nobo riba tereno petrolero,
manera e Ministro di Energia a anuncia.

Ta ayera tambe, cu insistencia a keda publica, cu Nicolas Maduro ta trata na bende
PDVSA cu Rusia.

Resumen mundial di e loke ta tuma luga ta, cu Nicolas Maduro no tin otro forma pa
keda na poder ya cu e debe total di Venezuela ta sigui subi mientras cu refinerianan na
Venezuela no por produci mas.

Den e situacion aki, e produccion petrolero na Venezuela ta paralisa y lo ta trata na
yega na un areglo cu e companianan stranhero cu ainda por produci petroleo na e pais,
manera Chevron.

Importante ta bira e posicion legal di Citgo den henter e asunto. E hecho cu Juan
Guaidó ta wordo reconoce na Merca como Presidente di Venezuela, ta haci cu e tin
poder ainda pa dicidi pa Citgo. Pero kico lo pasa si bende PDVSA cu Rusia y kico ta pasa
si Juan Guaidó no por bolbe Venezuela cu Asamblea Nacional blokia?

Ayera mester a resumi cu e situacion na Venezuela ta sumamente peligroso pa e region
di cual Aruba ta forma parti.