Page 16 - AWEM 160315 (1)
P. 16
16 AWEMainta Dialuna, 16 Maart 2015
Parlamentario Andin Bikker,
Cua risico a wordo
limita cu e contract
di hedging di
WEB?
PARLAMENTARIO Andin Bikker (PDR) den su discurso den
e reunion publico tocante e contract di hedging di WEB N.V. a
puntra na Presidente di Parlamento, “Cua risico a wordo limita
den e caso akinan?”
Segun e Parlamentario, ora un compania scoge pa hedge, e
proposito ta pa reduci risico di cambio di prijs di petroleo, pero den
e caso actual, e Parlamentario ta puntra cua risico a wordo limita?
Bikker ta splica cu den e contract actual, WEB a hedge 90% pa 95%
di e petroleo cu nan ta consumi, y pa un periodo hopi largo, esta
te na fin di 2016.
Segun Bikker, “Ta mescos cu bo ta drenta un casino, anto bo ta bet
riba preto, luga cora a sali. Mi kiermen, ta un roulette nan a hunga.”
Bikker ta bisa cu politicamente un hende tin cu para responsabel
den un caso manera esun actual. P’esey el a bisa na Presidente di
Parlamento, cu e kier puntra na Minister De Meza si “tabata sa, te
ki grado e tabata sa of no?”
Tambe Parlamentario Bikker a haci un mocion, den cual, e.o. el a
sugeri cu WEB a bay over na implementacion di e sistema di hegding
pa motibo di e mesun maneho di Gobierno, cual ta pa purba di ta
menos dependiente di ‘heavy fuel oil’.
Tambe Bikker a bisa cu na nivel internacional, companianan similar
na WEB cu haci uzo di e sistema di hedge, pa motibo di e impacto
cu nan actividadnan por tin riba nan comunidad, semper mester
cay bou di supervision di un of mas instancia estatal independiente.
Den nos sistema di Parlamento, Bikker a bisa, semper un of mas
Minister mester keda politicamente responsabel pa, den e caso aki,
e supervision di maneho di un compania estatal. Bikker a expresa
su preocupacion “sumamente grandi” pa e falta di supervision den
e caso aki, y a pasa un orden di dia.
