Page 5 - AB

Diabierna, 25 Juli 2025 AWEMainta
Aruba por Alimenta su Mes?
Un Bista Realistico Riba Nos Futuro di Cuminda
DEN un mundo perfecto, Aruba lo produci tur su mesun cuminda.
Berdura fresco, productonan lacteo, carni, pisca y marisco—tur
local, tur sostenibel. Pero laga nos ta honesto: 100% siguridad
di cuminda no ta realistico pa nos isla chikito. E geografia, e
clima, e limitacionnan di awa y e decadanan di dependencia riba
importacion ta haci e soño ey algo leu. Asina mes, un siguridad di
cuminda parsial—unda nos ta produci un porcion significativo di
loke nos ta come—no solamente ta posibel, e ta necesario.
Pues, kico ta e scenario mas probabel? Expertonan y observa-
donan practico ta di acuerdo: Aruba por mik realisticamente pa
un produccion local di cuminda entre 20% y 30% den e proximo
10 pa 20 aña. Pero solamente si e inversionnan corecto wordo
haci—y lihe.
Laga nos wak kico nos por produci. Sistemanan hidroponico y
LOCAL 8
agricultura vertical ya caba ta probando cu berdura di blachi
berde, yerba, tomati y concomber por florece den un ambiente
controla. Cria galiña y produci webo ta factibel na gran escala, y
cria cabrito pa carni y lechi ya ta culturalmente familiar y ambi-
entalmente adecua pa nos paisahe. Aquacultura—cria pisca den
tankinan controla of den ‘farm’ den lama—por suplementa nos
suministro di cuminda di lama na un manera sostenibel. Frutanan
manera papaya, mango y bacoba tambe por wordo produci local-
mente cu e cuido y acceso na awa corecto.
Door di enfoca riba e categorianan aki, Aruba por reduci poco
poco su dependencia riba cuminda importa—particularmente
e productonan fresco cu ta mas vulnerabel na retrasonan den
transporte maritimo y subidanan drastico di prijs.
Aki tin un plan di ruta posibel:
Pa 2028: Aruba por reemplasa realisticamente 5%
pa 10% di su importacion di cuminda—special-
mente berdura y galiña.
Pa 2032: Cu inversion na escala comercial, esaki
por crece na 15% of 20% di produccion local di
cuminda.
Pa 2040: Si maneho publico sigui apoy’é, Aruba por
yega na 25% pa 30% di siguridad di cuminda—sufi-
ciente pa fortalece nos resiliencia durante disturbi-
onan global.
Pero e vision aki ta depende di boluntad politico
y sosten di pueblo. Aworaki, agricultura no ta ser
mira como un carera profesional. Leynan di uzo di
tereno ta estricto. Awa ta caro. Y hopi biaha cuminda
produci localmente ta costa mas cu e alternati-
vanan importa. Pa progreso por tuma luga, gobierno
mester ofrece subsidio, beneficionan di impuesto y
acceso na tereno y tecnologia. Scolnan y medionan
di comunicacion mester yuda cambia e imagen di
agricultura pa uno moderno, inteligente y esencial.
Nos mester tambe pa e consumido apoya produc-
tonan local. Esey ta nifica acepta cu loke ta produci
localmente kisas no semper ta mas barata—pero e
ta mas fresco, mas sostenibel y mas sigur.
Aruba nunca lo produci trigo of cria baca na gran
escala. Semper nos lo mester importa. Pero nos por
crea un modelo hibrido—uno unda un parti signifi-
cativo di nos cuminda ta bin di nos propio tera, nos
propio sistemanan y nos propio hendenan.
Kisas nos no por alimenta henter e nacion, pero nos
por alimenta e futuro—si nos cuminsa plant'é awo.