Page 40 - AAA

Eman: A cuminsa trece nos hendenan

bek for di St Maarten

Posted on 09/11/2017 8:20 pm AST | Updated on 09/11/2017 10:45 pm AST

ORANJESTAD – Fuera di e pashentnan di dialyse y otro emergencia medico cu a logra
trece Aruba den fin di siman, Prome Minister Mike Eman a anuncia dialuna cu a logra
establece coneccion aereo pa cuminsa trece nos hendenan bek for di St Maarten. Segun
Eman, logicamente e aspecto aki ta di vital importancia den cualkier esfuerso cu Pais
Aruba kier haci den termino di ayudo humano y/of material. Cu esaki cla, e siguiente fase
den e asistencia ta pa atende cu e cantidad grandi di peticion di Arubianonan cu ta biba of
tabata di bishita na St. Maarten y a keda hopi traumatisa of afecta y kier sali di St.
Maarten pa regresa Aruba.

“Nos ta trahando basta dia caba y ayera nos a logra cu algun famia por a sali cu avionnan
priva. Awo restableciendo conexion aereo comercial, tur esnan cu ta preocupa y kier pa
nan famia bin ta importante pa bisa nan cu mester bay aeropuerto pa haci e diligencia pa
sigura luga riba e avion. Eman a haci e anuncio aki en bibo na radio merdia pa asina por
a avisa esnan na St. Maarten na tempo. Dialuna atardi a yega e dos prome buelo
comercial directamente for di St. Maarten cu Copa Airlines. “Ta importante pa e
pasaheronan cu kier bin Aruba, bay aeropuerto y regla un ticket y asina nos por percura
pa e Arubianonan por cuminsa regresa,” e mandatario a splica.