Page 2 - Aruba Bank 22 Aug 2015

A4

LOCALDiasabra 22 Augustus 2015

Oportunidad pa gas na Aruba: Nos no
mester warda nos mes gas yega!

Algun aña pasa, dentro di e plannan pa yega na un Aruba mas sostenible, tabata papia di e
cambio di fuel oil pa gas natural. Aunke gas natural tambe ta un combustible fosil, e bentaha ta
cu su ‘carbon footprint’ ta mas chikito ya cu e ta produci menos gas toxico.
Tabata papia di cambia pa gas na tanto WEB como e refineria di Valero. E tempo ey hasta a yega
na un MOU cu diferente partner potencial, entre otro Gas Unie, Anthony Veder, WEB Aruba
NV y Utilities NV. E idea tabata pa explora e posibilidad di trece gas natural den forma likido
(Liquified Natural Gas, LNG) pa Aruba. E refineria a participa tambe den esaki, tumando un
gran parti di e volumen total. E refineria a cay afo na 2012 como posible partner y WEB su so no
ta yega na e volumen minimo cu tabatin mester pa haci e facilidad pa LNG pagable. E proyecto
a bay na soño, den coma, of pio.
Di otro banda, tin expertonan cu ta bisa cu pa masha aña caba WEB por a switch pa usa gas, si
nan tabata desea esey. Awor cu WEB, sin problema, ta bay kima fuel oil y gas (di Ecotech) pareu,
e pregunta logico ta: pakico no ta bay usa gas y gas? Esey lo duna nos e bentaha cu gas natural
pa hopi decada lo ta bay ta hopi mas barata cu fuel oil, mirando e produccion enorme den henter
mundo. En general prijs di gas natural ta cuatro biaha mas abao cu esun di fuel oil. No ta por
nada tanto refineria na mundo ta cambia pa gas natural, y esun cu no hacie no por competi.
Interesante ta cu di banda di Merca ta mira awor oportunidad pa penetra den Caribe cu gas
natural barata. E obhetivo ta pa yega na e mercadonan chikito di e islanan den Caribe, di cual un
cantidad tabata beneficia di e programa PetroCaribe di gobierno di Venezuela, pero ta bisto awor
cu e programa aki tin problema pa cumpli di ambos banda: Venezuela tin cada bes mas problema
pa entrega petroleo pa via di stancamento di produccion, y varios pais tin problema pa cumpli cu
pago.
Alrededor y den e di prome ‘Caribbean Energy Security Summit’, teni na Washington, DC na
januari di e aña aki, cu Vice Prediente Joe Biden como anfitrion, a papia riba e posibilidad di
un programa di suministro di LNG (of CNG) na islanan den Caribe. Un di e islanan cu a
menciona como factible tabata Barbados, cu tin un tamaño comparable cu Aruba. Tambe islanan
mas chikito cu Aruba, manera Dominica y St. Kitts ta wordo menciona como posibilidad. Por
cierto, a comprende cu un delegacion di Aruba tabata presente na e evento na Washington, pero e
detayenan aki no a ser divulga na Aruba.
Ta papia di dos posibilidad di entrega di gas natural: construi facilidadnan pa ricibi LNG pa e
paisnan cu tin volumen pa LNG, y entrega CNG na esunnan mas chikito. Ta papia hasta di e
disponibilidad di fondonan di Banco Interamericano di Desaroyo (IDB)pa subsidio na e paisnan
cu ta desea di haci e transicion pa gas natural. Total ta calcula cu henter e programa lo costa menos
cu 1 biyon dollar, cu mayoria inverti den e instalacionnan grandi di paisnan manera Republica
Dominicana y Jamaica.
Un cambio pa gas natural no ta mara na e factibilidad di LNG, cu ta exigi un volumen grandi,
pero por haci uso di Compressed Natural Gas (CNG) – gas na presion mas abao - cu por wordo
entrega na volumen mas chikito.
Den un informe di Pacific Rubiales, un compania di gas y petroleo Canades/Colombiano, cu
ta exporta gas natural via su haf na costa di Caribe, ta menciona e posibilidadd di entrega di
gas natural (CNG) via transporte cu barge. Aruba ta un di e islanan mas accesible pa gas di
Colombia, pero tambe Trinidad & Tobago tin e mesun servicio aki.
E oportunidad pa uso di gas a mediano plazo ta haci tambe cu nos no tin cu spera te dia Aruba
haya su mes gas, si algun dia esey bira realidad. Si acaso e pruebanan di fin di e aña aki resulta
exitoso mes, produccion di e gas ey por bay dura mas di cinco aña ainda. Pero, gas cu no ta di nos
tambe ta barata….
E informacion aki por lo menos por sirbi pa haci nos mas atento pa cu e alternativa aki pa sali
for di fuel oil caro, cu tin nos mara tambe na un contrato di hedging. Ta posible pa deshaci di fuel
oil dia e hedging agreement vence? Of tin dealnan pa entrega di fuel oil pa hopi aña ainda, cu
ta haci imposible pa Aruba deshaci di heavy fuel oil di cualkier manera? Ta bira tempo pa haya
claridad riba esaki.