Page 47 - AHATA
P. 47
ORANJESTAD (AAN): Aruba Ports Authority (APA) ta anuncia cu apertura di e prome
consulta di mercado na December a duna resultado positivo Teniendo cuenta cu a
cuminsa un aña nobo, cu e periodo di vakantie meymey di esaki, y pa duna tur partido
oportunidad pa reacciona riba Port City Oranjestad, APA ta prolonga e consulta di
mercado te cu 24 januari, 2020.
Cu e desaroyo di ‘Port City Oranjestad’, APA y Gobierno di Aruba kier transforma e area
di Oranjestad, ofreciendo un Combinacion atractivo di oportunidadnan residencial y
laboral cu ta contribui na e desaroyo di e isla di Aruba.
‘Port City Oranjestad’ lo actua como un magneet pa residentenan y turistanan, cu
boutique hotels, casnan residencial, oficina, facilidadnan di parkeo, beach, hotel, café,
bar, restaurantnan y shops.
E plan ta pa inclui un Water Front Park public entre e terminal di crucero y Bushiri
Beach. Den su totalidad, e area ta 20 hectarea di locual 12 hectarea ta destina pa
wordo comberti den un espacio publico y 8 hectarea ta destina pa e desaroyo
comercial.
Un inversion cu ta estima na 575 miyon dollar mericano, pa e siguiente 10 pa 20 aña. E
inversionistanan y desaroyadornan priva lo inverti alrededor di 500 miyon dollar
mericano. APA ta buscando desaroyadornan y asociadonan cu tin experiencia den
financiamento conhunto y e desaroyo di percelanan similar, desde diseño pa operacion
te final.
Adicionalmente, APA kier uza e oportunidad di consulta di mercado pa haya sa un tiki
mas di e necesidadnan di e usuario y operadornan, pa asina por sigura cu e suministro
y demanda ta balansa ora cu e invitacion formal tuma lugar. E percelanan di e area lo
wordo reparti y desaroya den fase.
E consulta di Mercado aki ta enfoca riba e percela mas west, banda di Bushiri Beach. E
Proyecto Port City Oranjestad ta resultado di un colaboracion estrecho entre APA,
Ministerio di Turismo, Salubridad Publico y Deporte, Directie Infrastructuuren Planning
(DIP), Dienst Openbare Werken (DOW), Aruba Tourism Authority (ATA) y Port of
Amsterdam International como capacidad consultivo.
