Page 20 - FLIP

Parke Solar na aeropuerto ta cla y Aruba por ta orguyoso di
dje

Publication: Wednesday, 1 April 2015. Categoria: General

Prome Minister Mike Eman

ORANJESTAD(AAN): E Parke Solar na Aeropuerto International Reina Beatrix ta cla. E di dos
fase riba e parkeerplaats a culmina. E sistema ta genera 3.6 MegaWatt di electricidad pa medio di
14 mil panel solar contecta di manera moderno cu ta integra den e red di coriente di nos isla. E
produccion aki ta ekivalente na e consumo di 2.500 cas na Aruba y ta hacie e proyecto di mas
grandi den su forma pa loke ta area di Caribe.

Diabierna ultimo Premier Eman den su calidad di Minister di Ciencia, Innovacion y Desaroyo
Duradero hunto cu Minister di Energia Mike de Meza a realisa un recorido den e facilidad den
compania di Fons van Pul, director di Pfixx Solar Systems y inversionista local Milton Harms.
Na final, e mandatario a expresa su satisfaccion pa mira con parti di e vision di sostenibilidad
total pa Aruba ta conoce un avance mas.

“Aruba por ta orguyoso cu cada dia nos ta mas cerca den haci nos metanan bira realidad,” Prome
Minister a expresa cu hopi satisfaccion diabierna atardi. El a splica cu cada proyecto cu su
Gabinete ta ehecutando den e area di energia y sostenibilidad ta innovativo y hopi biaha
complica, loke ta genera duda. A keda demostra cu Aruba ta asocia cu partnernan corecto y ta
cumpliendo cu su promesanan. “Tin hopi plan similar rond mundo, pero poco pais ta logra
realisa nan. Aruba ta tuma e liderazgo den un direccion sumamente positivo y ta sirbi como
ehempel pa mundo,” Eman a indica.
En berdad, e instalacion na Aruba, como por ehempel esun na aeropuerto, no ta hopi grandi
compara cu otro paisnan, pero si por bisa cu na Aruba ta logra completa y esey ta loke ta
importante, e resultado final. E hecho cu Aruba ta mustra ta cu e ta importante no solamente pa
Aruba, pero pa stimula otro paisnan. Esey ta algo cu nos representantenan ta wak cada bes den
encuentronan internacional. Aruba ta worde poni como ehempel central pa kere den un vision y
cana e caminda aki.