Page 56 - MIN ECEM 29 JUNE 2017

Lider di AVP Mike Eman den reunion di contacto na Jan
Flemming

Wednesday, 28 June 2017 22:03
Comparti

Dialuna anochi un biaha mas lider di AVP Mike Eman tabatin un reunion cu habitantenan di Santa Cruz, e biaha aki
den e bario di Jan Flemming. E lider a wordo compaña pa dos candidato nobo di cu a wordo presenta na e publico
presente. Nan ta Clayton Croes, di Paradera y Arondino Croes, di Santa Cruz, kendenan tambe a splica nan vision y e
motibonan pa cual nan a uni na e partido berde.

Den su presentacion, e lider di AVP a splica cu na momento cu nan a wordo eligi na 2009, a pone como
meta pa traha diferente cu e gobernacionnan anterior, esta apesar cu tabatin mayoria, a tene sesionnan
di consulta durante lunanan largo. “Apesar cu nos tabatin 12 asiento, nos a sinti e necesidad pa tene
dialogo pa nos bira un gobierno cu ta representa Aruba di un forma mas legitimo. Tabata importante
pasobra den e añanan anterior no tabatin esaki. Tabata goberna di un forma polemico y un gobernacion
estilo autoritario.”
Durante gobernacion, e lider a sigui splica, pa mehora barionan, a scucha habitantenan, via Town Hall
Meetings entre otro. “Como hoben politico mi a keda hopi afecta ora cu mi a mira e casnan social na Pos
Chiquito. Esaki tabata ehempel di abandono y negligencia cu mester cambia, pero a haci esaki den
consulta y cu participacion di e habitantenan,” Eman a splica e publico.
Despues di esaki, e lider via un ‘Power Point Presentation’ a duna un splicacion di tur loke e dos
gobiernonan cu el a lidera, di cual un di nan cu e ta hopi orguyoso di dje ta esun di hospital, unda cu
awor ta bay tin 17 sala di emergencia y lo ta un instituto cu un servicio special y digno di e pueblo, unda
cu privacidad ta prevalece. Pero tambe tin mas pensamento nobo den e gobernacion di su partido, unda
no solamente ta construi e caminda, pero ta trece tambe e condicion di bida entre e camindanan, pa
mehora calidad di bida di e ciudadanonan. “Tur esaki ta cosnan grandi cu ta wordo haci,” Eman a bisa.