Page 29 - HOH

Por a mira varios sindicato ta contra legalisacion di marihuana. Minister di Salubridad

Publico, Turismo y Deporte, Dangui Oduber, ta bisa cu ta importante pa gobierno duna e

informacion corecto. Pa e sindicatonan tambe.

E sindicatonan a expresa cu nan ta contra marihuana. Gobierno tabata hopi cla den esaki.

Oduber, como minister di salud publico, a bisa na mas cu un ocasion cu loke ta bezig

cun’e ta un trayecto di ley pa legalisa e uzo medicinal y no recreacional.

No por imagina ken por ta contra, sea ta sindicato of cualkier otro persona, di haci uzo di

cannabis pa uzo medicinal, pa yuda salud di hende. Esey a pone den e programa di
gobernacion, cu tres partido, MEP, POR y RED a firma y ta riba e trayecto ey ta canando.

Den ningun momento a papia di legalisa cannabis pa uzo recreacional. No ta papiando cu

lo bin koffieshop of humamento riba caya, sino e uzo medicinal pa traha productonan

medicinal.

“Esaki ta falta di informacion y ta deber di gobierno pa educa esnan cu no tin

informacion di e materia. Logicamente ta bay comparti tur e informacion aki cu

comunidad, cu sindicatonan, cu Parlamento di Aruba, pa na un forma hopi transparente

tur hende ta na altura kico ta e plannan di gobierno, kico ta e vision di gobierno y kico ta
bezig cun’e, pa asina tur hende compronde e materia.”

E minister a reitera cu e uzo recreacional ta for di e discusion aki. Ta papia solamente

riba e uzo medicinal pa e hendenan cu tin mester di dje. Mayoria di pais na mundo a

legalisa caba cannabis medicinal. Algun pais a legalisa e uzo recreacional, pero awo e
prome paso pa e pais ta e uzo medicinal.