Page 14 - ATA JUNE 30 2015

Aruba Summer Music Festival un exito

Publication: Monday, 29 June 2015. Categoria: General
Ronella Tjin Asjoe-Croes di Aruba Tourism Authority

ORANJESTAD (AAN): “Nos lo tin cu caba di haya tur cifra aden ainda, pero e prome impresion
di e tres anochinan y e cobertura riba red social ta mustrando masha positivo”, asina Ronella Tjin
Asjoe-Croes, C.E.O. di Aruba Tourism Authority a bisa diadomingo mainta despues di repasa e
prome reportahenan di e dos anochinan di Aruba Summer Music Festival.
Awor lo mester evalua si e cantidad di turistanan proyecta a yega nos isla, pero a base di benta
nan online, via agencia nan di biahe den e mercado di Venezuela, y a base di feedback di
aeropuerto y hotelnan por deduci cu e fin di siman tras di lomba tabatin un porcentahe di
bishitante adicional riba nos isla. Mescos por bisa cu algun indicacion inicial di tiendanan di
marca ta ilustra tambe cu benta nan tabata mas halto cu normal.
Pa loke lo bira e cobertura den media tradicional, esey lo cuminsa awor mesora despues di e
evento mes. Sinembargo tanto prome cu e evento, durante, como tambe mesora despues, prensa,
“influencers” y tambe e artistanan mes a publica potretnan y video riba nan pagina di Facebook,
Instagram y Twitter cu ta percurando pa un promocion impagabel caba pa nos isla.
Por ehempel Jerry Rivera tin 2.7 miyon siguido riba su pagina di Facebook y 117 mil riba
Instagram, Elvis Crespo tin 694 mil siguido riba Facebook y 48 mil riba Instagram, Carlos Vives
tin 2.9 miyon siguido riba Facebook y 975 mil riba Instagram, Nikky Jam tin 13 miyon siguido
riba Facebook y 4.3 miyon riba Instagram mientras cu Pitbull tin 60 miyon siguido riba
Facebook y 2.1 miyon riba Instagram.