Page 13 - AM211026

Diamars, 26 October 2021 AWEMainta.com 13

Tur club di Kiwanis a uni pa participa

n’e K1-Day na Imeldahof

Diasabra mainta dia 23 di october 2021 diferente

club local di Kiwanis a uni pa un causa comun den e
proyecto K1-Day. Kiwanis One Day ta un iniciativa di
Kiwanis International pa demostra kico tur por wordo

logra cu trabao boluntario den un solo dia.

E aña aki Kiwanis a duna aporte na Stichting Kinderhuis
Imeldahof na Noord. Imeldahof ta un instancia cu ta

ofrece vivienda na muchanan cu pa un motibo of otro

no por keda na nan cas. Asina Imeldahof ta duna cuido
na mucha homber te cu diescuater aña y na mucha
muher te cu diesocho aña.

Kiwanis a scoge Imeldahof mirando nan necesidad
halto pa mantencion di e facilidadnan. Asina e
trabaonan boluntario a inclui verfmento parti paden di

algun di e casnan, mantencion y chapimento di hardin

y verfmento di e gazebo y bankinan di pafor.

E obranan di man aki (“hands-on”) ta un forma di duna

bek na nos comunidad haciendo uso di fondonan cu

Kiwanis ta recauda den comunidad.

N’e actividad aki a participa un total di mas of menos

140 boluntario di Kiwanis. Tur club local di Kiwanis a

keda representa, pa menciona: Kiwanis Club of Aruba,
Kiwanis Young Professionals of Aruba, Kiwanis Club
of San Nicolas, Kiwanis Club of Palm Beach, y tambe

tur e clubnan hubenil di e Kiwanis “Service Leadership

Programs” cu ta establece na diferente scol na Aruba.

Imeldahof y e clubnan di Kiwanis uni a keda sumamente

satisfecho cu e actividadnan di e dia menciona. Riba

e portretnan adhunto por mira e boluntarionan den
accion.
Esaki ta di 10 aña cu ta haciendo e iniciativa boluntario

aki, cu participacion masal di parti di e miembronan di

e respectivo clubnan.

Kiwanis International ta un instancia caritativo global

cu ta dedica na haci nos mundo mihor dor di cambia

un comunidad pa medio di un mucha cada bez. Mas
informacion tocante e clubnan di Kiwanis na Aruba
como tambe di Imeldahof por haya riba e paginanan

di Facebook.