Page 12 - KPA

Cuerpo Policial tambe tabata orador y a duna diferente lectura, tambe a conta
cu Fred Moreno di Merca. Anualmente Cuerpo Policial di Aruba ta organisa
seminarionan di e partinan di desaroyo, asina Vanessa Tjon, Comisario di
Cuerpo Policial Aruba a remarca. E seminarionan duna no ta solamente riba e
parti di conocemento pero tambe di topiconan actual cu polisnan ta enfrenta
diariamente.

John Larmonie di departamento di comunicacion, informacion y prevencion di
Cuerpo Policial Aruba a expresa cu nan a organisa e seminario pa dialoga riba
problema di gang na Aruba. E topico aki no ta algo nobo y ta existi pa basta
tempo. Pero den e ultimo añanan el a desaroya bira mas negativo y a cuminsa
bira mas peligroso. Cuerpo Policial semper ta pro activo riba tur tereno y a bin
cu e tema aki pa asina duna mas informacion tanto na agentenan policial como
invitadonan, manera KIA, empleadonan di departamento social y diferente otro
departamento cu tabata invita. Durante e seminario aki, Aruba por a siña hopi
mas for di e experto di Merca con nan ta trata cu e topico di gang.

Minister di Husticia, mr. Andin Bikker a habri e seminario. Esaki tabata su
oportunidad pa adresa tur esunnan presente di Cuerpo Policial Aruba. El a indica
cu e ta un persona cu su portanan ta habri pa tur miembro di Cuerpo Policial
Aruba. Tambe e tin e filosofia cu ora di identifica un preocupacion den
comunidad, ta busca un solucion y esaki ta algo cu el a bisa ta spera di e
Polisnan tambe.

Fred Moreno di National Crime Research Center di Chicago tambe tabata un di e
oradornan y a expresa cu su topico tabata di e gangnan na Chicago. Meta di su
presentacion tabata pa habri mente di hende cu aki tambe ta existi gangnan y e
con pa atende cu nan den un miho manera. E tin un experticio di 25 aña cu e
departamento Policial di Chicago y el a retira como experto y recherche cu
tabata investiga gang. Un sugerencia cu e tin ta pa comunidad ta consciente cu
tin gangnan y cu nan ta un menasa. No solamente pa personanan individual
pero tambe pa comunidad en general y cu nan ta forma peliger p’e situacion
economico.