Page 41 - AHATA

Durante e conferencia di prensa a puntra Dangui Oduber si e tin confiansa den e ATA

actual? Tur hende sa cu Oduber tabata critico riba e maneho di turismo. Na su parecer por

a haci mihor, esta atrae e turista cu ta gasta mas placa. Esey tabata parti di e vision di

ATA tambe. Pero prome cu duna un expresion riba e maneho di ATA con el a wordo

hiba, ta prefera di warda un rato y haya e informacion mas detaya prome cu haci un

expresion tocante si e maneho tabata bon of malo. No ta bay bisa na e momentonan aki si

e manera cu ATA a wordo maneha e ultimo 8 añanan aki tabata e miho maneho of no
tabata e miho maneho. Pesey ta prefera di warda un rato, laga e formacion concretisa,

haya tur informacion como futuro gobernantenan y una bes cu tin tur informacion na

manera transparente e ora por delinea un maneho e ora bo sa kico abo lo bay haci

diferente.

Turismo, te cu awe, ta nos unico pilar economico. Logicamente turismo ta keda contribui

na economia. Semper e discusion cu Dangui Oduber a hiba tabata cu apesar cu e turista ta

bin, apesar cu e ta gasta e placa, ora cu bay tuma e averahe di cada turista cu ta bin nos

pais, cuanto placa cada turista ta laga atras, esaki a bay atras cu casi 100 dollar pa dia.

Durante nan estadia, si nan keda un siman, papiando di casi 700 of 800 dollar cu cada

turista ta gasta menos durante nan estadia. Esey ta e discusion cu a hiba e ultimo añanan

aki, cu apesar cu e turista ta bin, cu segun e rapportnan ta contribui na economia, pero ta

wak cu e turista cu ta wordo treci, no ta e turista cu nos tabata custuma di dje. Cada

turista ta lagando entre 800 y mil dollar menos durante nan estadia, di locual tabata

custuma na dje durante e periodo di MEP.

Pesey a pone den e programa di Gobernacion aki, cu kier mira e turista bek cu ta laga

placa atras den nos economia y kier mira e turista cu ta gasta manera cu e tabata gasta

antes, cual no a mira esaki den e resultado e ultimo 8 añanan aki.