Page 48 - MIN TTC SEPT 25, 2015

Aruba Bank a contribui cu un bunita suma pa restauracion
di California Lighthouse

Publication: Friday, 25 September 2015. Categoria: General

ORANJESTAD (AAN): Ayeramainta Aruba Bank a haci entrega di un check na Stichting
Monumenten Fonds Aruba pa asina contribui cu restauracion di un di e monumentonan mas
famoso di Aruba, esta California Lighthouse.

Director di Monumenten Fonds, Sra. Anne Witsenburg a splica cu e proceso di renovacion a
cuminsa tres aña pasa, y California Lighthouse tabata den un estado hopi deteriora. Nan meta ta
pa conserva e pasado pa futuro.

E faro tin un historia di hopi interesante cu a cuminsa mas cu 100 aña pasa y esaki a wordo skirbi
pa Sr. Romulo Fingal, kende tabata presente durante e ocasion.

Segun Sra. Witsenburg, Stichting Monumenten Fonds Aruba a traha hopi duro pa busca
fondonan pa cuminsa cu restauracion di faro, cu nan a constata cu lo ta necesario mas di 1 miyon
florin pa logra esaki.

Minister Otmar Oduber ta hopi contento cu e proyecto y a gradici tur esnan involucra, pa nan
trabao y esfuerzonan pa logra restauracion di faro. Y el a agrega cu recientemente nan a aproba
un cantidad di 36 propiedad cu lo wordo proteha, no solamente esnan di Gobierno, pero tambe
propiedadnan priva.

Aruba Bank, cu ta celebrando nan di 90 aña di existencia, a dicidi di apoya e proyecto, y a haci
entrega di un check na Stichting Monumenten Fonds Aruba, cu e suma di 150 mil florin.

Proyecto di renovacion di California Lighthouse lo keda cla den 170 dia di trabao.

Aruba Ports y La Trattoria Faro Blanco tambe tabata presente pa firma acuerdonan como
participantenan di e proyecto. Aruba Ports lo keda encarga cu e luz di faro y La Trattoria Faro
Blanco lo guia gruponan di ocho persona, tanto turista y local, pa subi y haya un tremendo bista,
ora esaki keda cla.