Page 22 - awe1306

Dialuna 13 di Juni 2022

FORTALEZA PA FAMIA.

Scirbi pa Pastor Marcel Balootje.

BAN TRECE ORACION BEK NA SCOL.

Nos ta duna Gloria nan Dios, pa resultado di tur scol, con muchanana a gradua, tanto pa esnan cu ta
caba scol, como esnan cu ta cambia klas, pasobra nos ta mira e esfuerso cu a wordo haci, y esfuerso
semper mester wordo premia cu agradecimento.

Pero conta cu e bida spiritual di nos hobennan,tanto esnan cu ta bay scol y esnan cu no ta bay scol?Nos
hobennan tin un relacion spiritual berdadero cu Dios, nos hobennan tin Dios na prome lugar den nan
curazon? Pasobra nos ta preocupa cu tur cos pa nos hobennan, pero masha poco bo ta tende, tocante
di relacion di nos hobenanan cu Dios, nos hobennan tin conocemento di tur aparato electronico,
digital, internet, etc, tin hoben tin un cocnocemento asina grandi riba nan telefon, cual ta cos di
admira, y bo ta ripapra cu nan ta biba pa nan telefon, y pesey nan ta cana bao di stress ora nan telefon
no ta funciona bon, of no tin data.
Tur locual ta hala nos atencion mas cu Dios ta hiba nos na idolatria, ta haci nos golos , ta kita nos
tempo pa Dios. Cuanto hoben nan relacion cu nan telefon ta mas importante cu nan mayornan, hasta
telefon a kita atencion di ruman pa ruman den cas, pasobra cada un ta den nan telefon. Notable
tabata cu antes mucha tabata pleita cu otro den cas, pero awor nan ni sikiera tin atencion pa otro,
pasobra e telefon a come nan curazon. Mirando e situacion mundial, kico ta move rond di nos, ta hopi
importante pa nos ban bek cu oracion na scol. Oracion na scol ta ta necesario tanto pa e esun cu ta
duna les, como e alumno.

Oracion ta trece proteccion, bendicion, y ta habri mente tanto di esun cu ta duna les como alumno.
Nos conoce hopi caso di bullying y hopi caso di pelea, pero tin di e casonan tristo cu ta keda scondi.
Pero que hubo di muchanan, cu ta traumatisa cu problema na cas y cu un simpel oracion mainta na
scol por habri nan mente y nan curazon pa nan por studia mihor. Nos ta wak muchanan cu ta bin scol
mainta sin un pida pan, pero tin hopi mucha cu mester di yudansa spiritual, no yudansa religioso, e
mucha aki mester sa cu ta exisiti un Dios y cu e por bati na su porta, 24/7.

Nos tur ta na altura cuanto desviacion tin, y cuanto mas tin na caminda, y tur ta mik riba e hubentud,
y di berdad nos tur sa cu ta solamente Dios por salba nos hobennan di e avalancha di maldad cu ta
na caminda . Pesey den nomber di Hesus e suplica ta bini pa nos bini bek cu Oracion na scol , cual por
libra nos hobennan di hopi maldad cu ta ataca fisico, mental ,y spiritualemente. No ta wega locual ta
pasa den exterior den otro scolnan, y nos tambe ta parti di mundo, Dios libra nos, Dios spaar nos, pero
nos tambe mester pone atencion, y yama riba e nomber di Dios na tur scol.

Ta bay bini oposicion , pero e ora ey nos ta bin realisa, cuanto mayor di berdad ta stima nan yiu, y e
kier lo miho pe, pero e ta pensa cu su yiu no tin mester di Dios, pero di berdad tin un necesidad grandi
di Dios den bida di tur hoben .

Sinceramente,
Pastor Marcel Balootje.

22