Page 10 - AVB MARCH 9,2016
P. 10
RINI COOLEN: ARUBA TIN TALENTONAN
INTERESANTE DEN FUTBOL
Rini Coolen a wordo pidi pa AVB y su club PEC Zwolle dos siman prome cu su biahe pa Aruba pa e bira
bondscoach pa e weganan entre Aruba y St. Vincent & the Grenadines. Esaki ta un oportunidad cu el a
gara cu entusiasmo y el a cuminsa traha di biaha riba cera conoci cu e 35 hungadonan cu ta residencia
na Hulanda. Di e lista ey, el a “shortlist” 15 hungado.
Coolen a splica cu ora el a yega Aruba, el a topa cu hobennan cu hopi talento. Tabatin hopi bon hungado
y e tarea tabata pa haci nan funciona bon hunto den un team.
El a cuminsa traha cu nan di biaha y na final a dicidi cu di e hungadonan cu ta biba na Aruba lo inclui 15
den e seleccion y ocho hungado lo wordo invita pa bin di Hulanda. Na fin di dia a resulta e team di Aruba
a consisti 18 hungado di Aruba y cinco hungado cu a bin di Hulanda, como cu e otronan cu a wordo invita
pa diferente motibo manera blessure, situacionnan personal y compromisonan cu nan no por a kibra no a
logra bin hunga pa Team Aruba.
E di tres rond di World Cup tabata pa Aruba dos wega historico y Coolen a expresa cu considerando e
cantidad di training limita pa tempo e ta sumamente satisfecho, contento y orguyoso di e team. El a
gradici AVB, e team di tecnico y e hungadonan pa un hopi bon experiencia.
Talentonan ta nace tur parti di mundo, na Aruba esaki naturalmente tambe ta e caso, y loke nan mester
pa yega leu ta un bon programa di desaroyo, Rini Coolen a subraya. El a splica cu mester crea e
circunstancianan y ofrece e oportunidadnan pa nan bira exitoso tambe.
Despues di su experiencia cu e miembronan di seleccion, pero tambe e hobennan di SV Dakota cu a
hunga un wega di training contra e seleccion, Coolen a comenta cu Aruba definitivamente tin
hungadonan interesante cu talento y potencial. E coach a expresa cu entusiasmo tambe su disponibilidad
pa traha cu e talentonan di Aruba cu mas frecuencia, añadiendo si cu esey ta algo cu su club y AVB lo
mester discuti y evalua si ta posibel y con nan lo kier expande riba un relacion di trabao mas amplio.
