Page 23 - HOH

Durante un conferencia di prensa convoca pa Wit Gele Kruis Aruba, Dr. Oudshoorn a
splica cu e ta docter di mucha cu specializacion den neonatoloog. Y den e temporada
ey, el a ripara cu hopi mucha y hende grandi ta sufri di obesitas. Como neonatoloog, e
ta hopi envolvi cu babynan cu ta malo. Pero for di investigacion internacional ta conoci

cu hopi problema di un adulto ta presenta su mes caba for di e prome periodo di e bida
di un mucha nace, esta di 0 te cu 24 luna.

Tambe loke ta pasa cu e mucha di 0 luna te cu 6 luna, ta stipula hopi loke ta bay pasa

cu e persona ey ora e bira grandi. Pues si den e prome 3 luna bo ta duna bo Baby
demasiado cuminda, y e bira gordo… e chens ta grandi cu den futuro e lo tin problema
tambe cu dificultad di sobrepeso.

Pesey nan kier cuminza investiga con babynan ta wordo alimenta na Aruba, pasobra aki
por topa cu situacionnan unda por yuda e babynan aki pa evita cu nan ta bira gordo.

Hopi programa ta existi caba y ta dirigi riba muchanan cu ya caba ta sobrepeso y

obeso, pa percura pa nan baha bek di peso y bira saludable. Pero sigur lo ta mihor pa
evita cu e babynan crece yega te 12 aña di edad como mucha gordo.

Loke ta haciendo awor e siguiente 2 luna, ta haci un encuesta cerca mayornan cu ta

presenta cu nan Baby na Consulta. Ta bay haci uso di 3 studiante di medicina di
Groningen den esaki. Lo bay puntra e mayornan pa coopera, y contesta algun
pregunta. Esaki ta pa por haya un mihor bista di loke ta pasando, pa haya sa kico ta
alimenta e mucha cune, con hopi, con hopi e mucha ta yora, con e mucha ta reacciona

pa haya cuminda, etc.

Di e forma ey por saca un conclusion, y cu permiso di e mayornan, lo sigui progreso di
e baby pa 1 aña largo, y pone e resultado di esaki den forma grafico.

Durante aña, nan lo sigui haci algun pregunta pa asina mira si acaso tin mas adaptacion
pa haya sa mihor pakico muchanan ta sigui bira gordo.

Segun Dr. Oudshoorn, na Aruba ta sigui mira cu mas y mas baby ta birando gordo y
pesey ta importante pa start cu e investigacion. E studiantenan di Groningen lo tuma e
datonan, y nan tur lo keda anonimo. Esey ta loke Wit Gele Kruis ta garantiza, y lo bo
no por haya sa nunca e nomber di baby ni e nomber di e mayor den e database.