Page 23 - AUA BANK APRIL 17

Mester pasa e mocion of privatiza e tareanan nobo di Banco Central

Publication: Friday, 17 April 2015. Categoria: General

Parlamentario Bikker:

ORANJESTAD (AAN) – Den conferencia di prensa di fraccion di Partido Democracia Real, su
lider mr. Andin Bikker a toca e tema di e impuesto cu banconan local lo mester contribui cune na
Banco Central, pa financia su tareanan nobo.

E parlamentario a acentua cu e banconan comercial a dicidi cu nan no ta bay carga e impuesto
aki, y na opinion di PDR e ora ey gobierno mester ehecuta e mocion cu a wordo pasa, despues cu
gobierno a splica den Parlamento cu e margen di ganashi cu e transaccion di cambio di moneda
ta genera pa e banconan comercial, ta masha grandi.

Ta pesey, Bikker ta señala, Banco Central a bisa cu djey nan por come un pida di e bolo sin cu e
banconan comercial pasa e impuesto pa e consumidor. Asina BC por ehecuta e tareanan nobo cu
a wordo introduci, entre otro, pa “Financial Action Task Force”. E parlamentario a trece dilanti
cu na 2009 a bin un rapport negativo di FATF, y for di e tempo ey Banco Central a haya varios
tarea nobo pa ehecuta, entre nan supervision y esaki a conduci cu nan gastonan a aumenta.

E siman aki cu banconan comercial a expresa cu nan no ta bay cargue, a surgi un defecto den e
ley aki, pesey PDR ta haya cu e minister mester cambia e ley y pone cu e banconan no mester di
traspase pa e cliente.

Na momento cu e banconan no traspase e mag di kite for di margen di ganashi cu ta 28
porciento, loke indirectamente kiermen cu gobierno ta subsidia. Pa tal motibo PDR no ta
compronde pakico e actitud di e banconan.

E parlamentario a subraya cu si no tin manera pa cobra e impuesto, anto mester aboli e ley y si ta
asina cu enberdad Banco Central mester di placa pa realiza su tareanan nobo, lo mester privatiza
esakinan.

Lider di PDR a remarca cu di otro banda e fraccion ta hayando hopi reclamo di sector comercial
cu e reglanan di FATF ta wordo aplica na un manera increiblemente desproporcional, unda cu ta
mas facil bay habri un cuenta di Banco na Miami pasobra den un atardi bo ta keda cla, cu habri
un cuenta di banco aki na Aruba.

Segun e parlamentario por poco nan ta pidi e cliente su rapport di school basico, pa habri un
negoshi y hasta nan pidi un permiso di gobierno cu ta tarda dos siman pa haye, cual den henter
Reino (menos Aruba) el a wordo aboli.

Na lugar cu gobierno ta facilita e apertura di negoshi na Aruba, nos pais ta e unico pais den
Reino unda mester pasa den un cantidad di rekisito pa lanta un negoshi y pa colmo awor nan ta
introduci e belasting menciona.