Page 12 - AB

8 LOCAL AWEMainta
Weganan di azar online como diversificacion
economico strategico pa Aruba
DEN un tempo unda Aruba ta buscando diversificacion economico structural, ta
lanta e pregunta dicon e mercado mundial creciente pa weganan di azar online
ainda no ta wordo desaroya mas activamente riba e isla. E mercado mundial di
wega di azar online ta wordo estima na $84,8 biyon na 2023 y ta wordo spera
di crece te na $164,5 biyon pa 2033, cu un crecemento anual promedio di
casi 7%. Pa un economia manera esun di Aruba – fuertemente dependiente di
turismo y bou di presion fiscal creciente – ta tempo pa considera seriamente e
tendencia aki como un pilar economico potencial.
Aruba tin e base institucional necesario. E Departamento di Asuntonan di
Casino (DAC), bou di Ministerio di Husticia, ta encarga cu supervision di e sector
di wega di azar. Contrario n’e sistema di sublicencia contencioso na Curaçao,
Aruba ta exigi pa proveedornan haya un licencia directo y personal. E structura
aki caba ta un paso den direccion di transparencia y control, pero ainda falta un
strategia activo pa atrae e mercado internacional di wega di azar online tambe.
E lesnan for di Curaçao ta di gran balor den esaki. E isla a recauda den poco
tempo €11,2 miyon na entrada di licencianan di wega di azar online, pero
despues a confronta daño huridico y di reputacion pa motibo di incertidumbre
tocante autoridadnan, falta di transparencia y practicanan supuesto ilegal.
Netamente e erornan aki ta ofrece Aruba e oportunidad pa distingui su mes
como un hurisdiccion confiabel y eticamente responsabel, contal cu e haci
esaki corectamente.
Un parti esencial di un industria di wega di azar online exitoso ta garan-
Diamars, 8 April 2025
tisa comportacion di wega responsabel.
Internacionalmente tin diferente modelonan
p’esaki. Por ehempel, Reino Uni ta uza controlnan
di realidad obligatorio, limitenan riba perdida y
programanan di auto-exclusion pa preveni adic-
cion na wega di azar. Banconan hasta ta ofrece
e opcion pa blokia transaccionnan di wega di
azar. Aruba por, y mester, implementa medidanan
similar pa limita comportacion problematico
for di principio. Di e manera ey no solamente ta
proteha e poblacion, pero tambe ta fortalece e
confiansa internacional den e sistema Arubiano.
E potencial economico ta evidente. Door di
otorga licencianan di wega di azar online trans-
parente, supervisa y cobra impuesto, Aruba por
genera entradanan nobo significativo sin pone
presion adicional riba su ciudadanonan mediante
aumentonan di impuesto indirecto manera BBO
of accijns. Ademas, e sector ta ofrece oportuni-
dadnan pa empleo di calidad halto den IT, cumpli-
mento, servicio huridico y marketing. Tambe e ta
habri portanan pa colaboracion cu companianan
di fintech y innovacion tecnologico, cu cual Aruba
por profila su mes como un hub digital regional.
Bisando esaki, e rumbo aki ta rekeri curashi
politico y maneho strategico. Wega di azar online
ta un topico delicado, pero e riesgonan ta sinta
principalmente den un falta di regulacion, no
den e actividad mes. Door di pone transparencia,
marco legal y medidanan di proteccion social
central, Aruba por hunga un rol di ehempel den
e region.
E pregunta pues no ta mas si Aruba mester
considera wega di azar online como un punto di
enfoke economico, sino con y ki tempo e ta tuma
e paso aki. Den un mundo unda economia digital
ta desaroya rapidamente, para keto ta retro-
ceso. Aruba tin e oportunidad unico pa drenta e
mercado di crecemento aki – riba su mesun condi-
cionnan, cu control, transparencia y consciencia
social.