Page 72 - KPA

Caminda pa cana ta cortico y pronto e ley ta drenta na vigor
contra uso di celular den trafico

Tuesday, 20 June 2017 21:41
Comparti

E ley pa uso di celuar den trafico, mester wordo firma den e proceso legal ainda y na momento cu e ley aki ta completamente firma door di
minister Dowers , tambe tin cu bay gobernador. E ora ey e ta bay wordo publica, Na momento cu firma e publicacion den ley, e ta bira ley y
ta drenta na vigor e dia despues.
Ta spera cu dentro di algun dia, e ley aki bay na vigor. Pesey ta cuminsa cu campaña di informacion mas lihe posibel. Pa fin di e siman aki
caba ta cuminsa cu e prome informacion. Ta importante pa comunidad sa cu na momento cu e ley aki wordo publica, bo no por tin un
celular den bo man mas, na momento cu bo ta maneha un auto. Ta recomenda tur hende para un caminda, den parkeerplaats of canto di
caminda, pa bo haci bo yamada of traha cu un sistema handsfree, pero no core cu celular mas.

No ta haci esaki unicamente pasobra cu tin indicacion, cientificamente ta e miho cos pa haci, pasobra tin pruebanan tur caminda. Pero tin
prueba na Aruba tambe cu hopi accidente ta wordo registra caminda cu e personanan ta core dal den un palo di mata of piedra, of baha
caminda dal otro auto, of hala for di caminda dal otro auto y ora cu bay investiga, ta haya cu e persona tabata na telefon. Hopi biaha ta e
hecho cu nan ta cu e telefon den man.
Ta wordo prueba tambe cu e cantidad di alcohol minimo cu ta wordo considera como un persona cu ta burachi, ta e mesun cos si bo uza e
cantidad di alcohol ey cu si bo uza e celular den auto.
Celular ta desviabo y si bo no paga tino, por hincabo den problema. Cu esaki ta bay proteha bo mes tambe. Ta dirigi na e prevencion di otro
hende, pero logicamente e consecuencia ta cu bo tambe ta wordo protehi, na momento cu bo no ta uza e celular.

Hopi hende tin e mal maña di haci’e y e minister ta spera cu tur hende bira conciente pa no haci esaki mas. Behalve cu bo ta core riesgo di
siguridad den trafico, bo ta core riesgo di tambe wordo verbalisa.
Ki tempo
Minister a splica cu e por drenta na vigor otro siman caba. A cuminsa hopi lihe cu e proceso di informacion pasobra ya pa otro siman caba, e
ley aki por keda cla. Den concepto di minister ta importante pa e ley pasa. Pa otro siman ta sali for di e punto di bista cu tur documentacion
ta keda cla y cu e ley por keda firma pa asina ey e por bay na vigor.
Stipulacion den prijs
Den un caso asina, tin un stipulacion di prijs cu un hende por haya como multa, no ta hinca den e ley. Tin diferente categoria di boet cu por
wordo duna. Eseynan ta hinca den e ley di beslagvordering. Esey ministerio publico lo uza tambe na momento cu duna e multanan, segun
Minister Arthur Dowers.