Page 2 - AM201102

2 AWEMainta Dialuna, 2 November 2020

Anochi di ‘Halloween’ wordo converti

den un anochi di hopi asistencia policial

DIASABRA anochi manera tabata di spera,
celebracion di Halloween a tuma lugar den
practicamente tur bario y e peticion di Gobierno
y di DVG pa no forma grupo grandi y organisa
fiestanan, no a haya oido den un parti di pueblo.
Na diferente sitio riba e isla por a nota aglomeracion
di publico caminda por a mira hopi hende disfrasa
y gosando di e anochi, pero na algun sitio esaki a
casi crea confrontacion cu autoridadnan policial.

Un di e sitionan mas druk a resulta esun conoci di
Linear Park caminda realmente tabatin presencia
di hopi hende cu presencia di hopi oficial di Polis
caminda a tuma lugar control di trafico n’e sitio
mes y tambe a listra algun persona sospechoso
relaciona cu arma of droga.
Na Sero Patrishi a cende un sofa mey mey di
caminda kisas como celebracion di Halloween
mientras cu hasta tabatin un caso di tiramento na
Pos Chikito caminda ainda no ta conoci kico a
pasa.
Varios persona bou di influencia di alcohol a
wordo para pa Polis di cual algun a keda deteni y
entre nan algun chofer di auto, kendenan no tabata
apto pa maneha un auto y aki tambe tin detencion
a cay.
Polisnan tambe mester a atende varios caso di
accidente di auto caminda algun hende a keda
seriamente herida y otronan leve, pero cu a aporta
n’e anochi druk cu Polisnan tabatin tanto anochi y
durante di dia.

Polisnan tambe a controla na varios beach conoci
rond e isla caminda mester a actual contra di
aglomeracion di publico y aki tambe no ta tur cos a
bay nechi cu hopi agresion verbal contra Polisnan.
Un di e casonan mas serio a resulta di un hoben
na Sero Colorado caminda el a bay haci ‘kunstjes’
cu su bromer perde control, cay patras caminda e
hoben a sufri herida y sla serio na parti patras di su
cabes, loke a pone cu e mester a wordo transporta
cu urgencia pa Centro Medico pa tratamento.
Den e sector aki tambe Polisnan tabatin man yen
den fin di siman caminda hopi hende a busca
rumbo pa distrae nan mes despues di varios siman
y luna caminda tabatin limitacion pa hendenan
sali y diverti nan mes.

Sinembargo aki ta keda e advertencia cu tur
hende mester realisa e seriedad di e situacion cu
no solamente Aruba ta pasando aden, pero henter
mundo.
Aruba ta birando un di a paisnan cu tin e virus aki
hopi bou di control despues di algun siman hopi
delicado, pero ta keda na cada ciudadano pa duna
nan aporte n’esaki p’e situacion no bolbe escala y
bira un problema mas serio pa tur hende.