Page 11 - ROBERT CANDELARIA FLIP 15 JULY 2017

Tabatin hopi interes diahuebs mainta pa anuncio di e candidato nobo di AVP Robert
Candelaria, ex miembro di alto rango di Cuerpo Policial. Su ex hefe, Minister Arthur
Dowers, tabatin hopi elogio p’e profesionalismo di Candelaria, kende sigur ta un hopi
bon adkisicion p’e partido AVP.

E mandatario y candidato di AVP a bisa esnan presente cu “e importancia di trece un
profesional mas den e partido no solamente ta nifica cu nos solamente nos ta bay ta mas
miho prepara pa gana e eleccion di dia 22 di september awor. E ta nifica tambe cu tin un
confiansa sumamente grandi den e partido aki y mi a nota cu varios profesional a dicidi di
uni nan mes n’e partido.

E ta nifica cu e trabou cu a wordo haci bou mando di e partido aki, ta haya
reconocemento cerca personanan cu tin conocemento di e trabou. E unico partido cu por
bisa esey ta nos partido AVP”, Dowers a bisa den presentacion di e candidato Candelaria.

E ta mira Candelaria como un candidato toch hoben den politica, cual ta nifica cu e lo
mester wanta basta aña prome cu e por dicidi pa haci algo otro. El a papia di e situacion
lamentable na Aruba cu ora un persona drenta arena politica, e ta wordo señaladi ta parti
di un sistema politico y no pa nan profesinalismo. Esaki ta nifica cu nan mester keda
basta aña den e arena, y di e forma aki por contribui na cambio y desaroyo di e sociedad.

Den Husticia, Dowers a bisa, a traha hopi duro pa fortifica e organisacionnan pa logra un
bon base.

“Pero na final di dia, cada candidato cu uni su mes na AVP, ta haci esaki pasobra nan ta
kere den duna algo pa haci e sociedad mas miho. Mi ta sigur cu sr. Candelaria den su bida
priva tin suficiente instrumentonan cu cual, unda cu e bay sirbi, por duna un contribucion
n’e sociedad. Esey ta algo di aplaudi, cu un hende asina ta scoge pa politica enbes di keda
unda cu e tabata cu ta hopi mas sigur pa su carera”, Dowers a bisa.